نئی دہلی؍ پٹنہ: بہار کے وزیر اعلیٰ نتیش کمار نے جھارکھنڈ کی سابق گورنر دروپدی مرمو کو این ڈی اے کی جانب سے صدر کے عہدہ کا امیدوار بنانے پر وزیر اعظم نریندر مودی کا شکریہ ادا کیا ہے۔ انہوں نے خوشی کا اظہار بھی کیا۔ نتیش کمار نے کہا ہے کہ دروپدی مرمو کو صدر کے عہدے کا امیدوار بنانے کے لیے وزیر اعظم مودی کا تہہ دل سے شکریہ۔دراصل چہارشنبہ کو وزیر اعلیٰ کے دفتر سے اس سلسلے میں ایک خط جاری کیا گیا ہے۔ خط میں کہا گیا ہے کہ دروپدی مرمو ایک آدی باسی خاتون ہیں۔یہ بڑی خوشی کی بات ہے کہ ایک آدی باسی خاتون کو ملک کے اعلیٰ ترین عہدے کے لیے نامزد کیا گیا ہے۔دروپدی مرمو اصل میں اڈیشہ سے ہیں۔ اڈیشہ حکومت میں وزیر کے طور پر انہوں نے اپنی ذمہ داریوں کو بہتر طریقے سے نبھایا۔ اس کے بعد جھارکھنڈ کی گورنر کے طور پر بھی ان کا کردار قابل ستائش رہا ہے۔ وزیر اعلیٰ نے کہا کہ کل (منگل) وزیر اعظم نے بتایا تھا کہ دروپدی مرمو کو صدارتی امیدوار بنایا جا رہا ہے۔اس کے لیے وزیراعظم کا بھی تہہ دل سے شکریہ۔دوسری طرف نیشنل ڈیموکریٹک الائنس (این ڈی اے) کے علاوہ آندھرا پردیش میں حکمراں وائی ایس آر کانگریس پارٹی اور اڈیشہ میں حکمراں بیجو جنتا دل (بی جے ڈی) نے صدارتی انتخابات میں این ڈی اے کی امیدوار دروپدی مرمو کی حمایت کرنے کے واضح اشارے دیئے ہیں۔ مرمو کو مبارکباد دیتے ہوئے وائی ایس آر کانگریس پارلیمانی پارٹی کے لیڈر وی وجیا سائی ریڈی نے ٹوئٹر پر اپنے پیغام میں کہا کہ مرمو کو این ڈی اے کی طرف سے صدارتی انتخاب میں امیدوار قرار دیئے جانے پر دلی مبارکباد۔وزیر اعظم نریندر مودی نے بالکل درست کہا کہ محترمہ مرمو ہمارے ملک کی ایک عظیم صدر ثابت ہوں گی۔مسٹر ریڈی نے ٹویٹر پر مسز مرمو سے ملاقات کرتے ہوئے ایک فائل فوٹو بھی شیئر کی ہے۔ وائی ایس آر کانگریس کے 175 رکنی آندھرا پردیش قانون ساز اسمبلی میں 150 اور قانون ساز کونسل میں 33 ارکان ہیں۔ لوک سبھا میں 25 میں سے 22 اور راجیہ سبھا میں 11 میں سے 6 ممبران ہیں۔بھارتیہ جنتا پارٹی کی قیادت والے حکمراں این ڈی اے کے پاس 5,26,420 ہیں، جو مجموعی 10.79 لاکھ ووٹوں کے نصف سے کچھ کم ہیں۔اسے وائی ایس آر کانگریس اور بیجو جنتا دل جیسی جماعتوں اور آزاد امیدواروں کی حمایت کی ضرورت ہوگی۔
