واشنگٹن : امریکی صدر جوبائیڈن کو دھمکیاں دینے والے شخص کو حفاظتی اہلکاروں نے فائرنگ کر کے ہلاک کردیا۔ امریکی قانون نافذ کرنے والی ایجنسی ایف بی ا?ئی نے ملزم کے مارے جانے کی تصدیق کرتے ہوئے کہا ہے کہ مخصوص اہلکار ریاست یوٹاہ میں ملزم کے گھر گرفتاری کے لیے سرچ وارنٹ لے کر گئے تھے۔ ایف بی آئی نے مارے جانے والے شخص کی شناخت ظاہر نہیں کی ہے اور کہا ہے کہ اس حوالے سے تفتیش جاری ہے۔ اس کارروائی میں شامل 2 اہلکاروں نے بتایا ہے فائرنگ کے وقت ملزم کے پاس بھی اسلحہ موجود تھا۔بتایا گیا ہے کہ 70 سالہ کریگ رابرٹسن نامی شخص نے کئی مرتبہ سوشل میڈیا پر امریکی صدر جوبائیڈن کو دھمکیاں دی تھیں۔ کریگ رابرٹسن نے رواں ہفتے سوشل میڈیا پر پوسٹ میں دھمکی آمیزجملوں کا استعمال کرتے ہوئے کہا تھا کہ میں نے سنا ہے جوبائیڈن یوٹاہ آرہے ہیں تو میں اپنی بندوق سے گرد و غبار صاف کررہا ہوں۔ اس شخص کے خلاف نائب صدر کملا ہیرس اور اٹارنی جنرل کو بھی دھمکیاں دینے کی شکایات درج تھیں۔
