راشٹرپتی بھون میں حلف برداری ‘ انتخاب اور تقرر کے طریقہ کار پر کانگریس کا اعتراض
نئی دہلی ۔ 25؍ اپریل ( سیاست ڈاٹ کام) صدر جمہوریہ کے سکریٹری سنجے کوٹھاری ہفتہ کے روز سنٹرل ویجلنس کمشنر مقرر کئے گئے ۔ راشٹراپتی بھون کے اعلامیہ کے مطابق گذشتہ سال کے وی چودھری کی میعاد مکمل ہونے کے بعد یہ نگران ادارہ مخلوعہ تھا ۔ اعلامیہ میں کہا گیا ہے کہ راشٹرپتی بھون میں آج 10.30 بجے دن منعقدہ تقریب میں سنجے کوٹھاری کو سنٹرل ویجلنس کمشنر کے عہدہ کا حلف دلایا گیا ۔ 63 سالہ کوٹھاری نے صدر جمہوریہ کے روبرو اپنے عہدہ کا حلف لیا ۔ حلف برداری تقریب میں نائب صدر جمہوریہ ایم وینکیانائیڈو ‘ وزیراعظم نریندر مودی اور دیگر اہم شخصیات موجود تھیں ۔ وزیراعظم کے زیر قیادت اعلی سطحی سلیکشن پیانل نے فبروری میں کوٹھاری کے نام کی سفارش کی تھی ۔ اس وقت کانگریس نے سنٹرل ویجلنس کمشنر کے تقرر کے لئے اختیار کردہ عمل کی مخالفت کرتے ہوئے اس کو غیر قانونی غیر دستوری قرار دیتے ہوئے اس فیصلہ کو فی الفور منسوخ کرنے کا مطالبہ کیا تھا ۔ انسداد رشوت ستانی کے اس اعلیٰ ترین نگراں ادارہ کے اعلی ترین عہدہ پر سنجے کوٹھاری کے تقرر کے بعد حکمراں بی جے پی اور اپوزیشن کانگریس کے درمیان جاری لفظی جنگ میں مزید شدت پیدا ہوگئی ۔ ان کے تقرر پر ردعمل کا اظہار کرتے ہوئے کانگریس کے ترجمان منیش تیواری نے فبروری میں مطالبہ کیا تھا کہ درخواستوں کی مکرر طلبی کے ساتھ سی وی سی کے تقرر کے عمل کا ازسرنو آغاز کیا جائے ۔ سنجے کوٹھاری 1978 بیاچ کے ہریانہ کیڈر سے تعلق رکھنے والے آئی اے ایس افسر ہیں جو جون 2016 میں معتمد محکمہ پرسونل و تربیت کی حیثیت سے وظیفہ پر سبکدوش ہوئے تھے ۔ سی وی سی سربراہ کی میعاد چار سال یا ان کی عمر 65 سال ہونے تک رہتی ہے ۔ اس دوران حکومت نے کپل دیوتر پاٹھی کا صدر جمہوریہ کے نئے سکریٹری کی حیثیت سے مقرر کیا ہے ۔