نئی دہلی: کانگریس کے صدر ملک ارجن کھرگے نے پیر کو پارٹی کے قیام کے 138 ویں سال پر ’ملک کیلئے عطیہ‘ مہم کا آغاز کیا اور کہا کہ اس مہم میں ملک کے کسانوں کی مدد سے عام لوگوں کی ترقی میں مدد ملے گی۔ آج یہاں مہم کا آغاز کرتے ہوئے کھرگے نے کہا کہ ملک کے لیے عطیہ کرنے سے کانگریس عام لوگوں سے مدد لے کر آگے لے جانے کا کام کرے گی۔ انہوں نے کہا کہ کانگریس کو ہمیشہ عام لوگوں کی مدد ملتی رہی ہے ۔ مہاتما گاندھی نے بھی اپنے ہم وطنوں کی مدد سے ملک کیلئے آزادی حاصل کی۔ یہ پورے ملک میں ایک مہم بن رہی ہے جس میں لوگ آگے آ رہے ہیں اور ملک کے لیے چندہ دے رہے ہیں۔ اس مہم کو کامیاب بنانے کیلئے عطیات کی اپیل کرتے ہوئے انہوں نے کہا کہ ’ڈونیٹ فار کنٹری‘ مہم پسماندہ طبقات کے حقوق کو برقرار رکھنے ، عدم مساوات کو ختم کرنے اور چند منتخب سرمایہ داروں کی حمایت کرنے والی آمرانہ حکومت کے خلاف ایک مضبوط اپوزیشن بننے کا عزم ہے ۔ اس کے لیے donate.in پر لاگ ان کریں اور اپنا اہم تعاون ضرور فراہم کریں۔ یہ اقدام 1920-21 میں مہاتما گاندھی کے تاریخی ’تلک سوراج فنڈ‘سے متاثر ہے ۔ کانگریس کے صدر نے کہا کہ یہ ہندوستانی آئین کی اقدار کے تحفظ اور انڈین نیشنل کانگریس کی 138 سالہ شاندار تاریخ کو محفوظ رکھنے کے لیے ملک گیر تحریک ہے ۔ ملک کو آگے لے جانا ہم سب کی مشترکہ ذمہ داری ہے جسے ہمیں مل کر پورا کرنا ہے ۔ دریں اثنا کانگریس پارٹی نے بھی اپنے افیشل پیج پر ٹویٹ کیا کہ ملک کے شہریوں سے اس مہم میں شامل ہونے کی اپیل کرتے ہیں،اس ذمہ داری کو نبھانے کے لیے ، ہم ’ملک کے لیے عطیہ‘ کے ذریعہ ایک اور قدم آگے بڑھ رہے ہیں۔
