غیاث الدین میموریل سوسائٹی کی جانب سے ہونہار طالبات میں نقد انعامات کی پیشکشی۔ صغریٰ ہمایوں مرزا کو خراج عقیدت
حیدرآباد۔3ستمبر۔ ( پریس نوٹ ) ۔ صفدریہ گرلز ہائی اسکول نے اپنی تاسیس کے 90برس مکمل کرلئے۔ یہ اسکول محترمہ صغریٰ ہمایوں مرزا کے خوابوں کی تعبیر ہے۔ محترمہ صغریٰ ہمایوں مرزا نے 1934ء میں یہ اسکول قائم کیا تھا۔ اب ان کی چوتھی پشت اس اسکول کی ذمہ داری خوش اسلوبی سے نبھارہی ہے۔ ان خیالات کا اظہار محترمہ غوثیہ سلطانہ حال مقیم شکاگو نے طالبات کے نام اپنے ایک پیام میں کہا جو اسکالرشپ تقسیم کے فنکشن میں پڑھ کر سنایا گیا۔ اسکول کی جماعت اول سے دہم تک کی ہونہار طالبات کو غیاث الدین میموریل سوسائٹی کی جانب سے 3؍ستمبر کو نقد انعامات پیش کئے گئے۔ ان انعامات کا اہتمام محترمہ غوثیہ سلطانہ گزشتہ چھ برس سے کررہی ہیں۔ 3؍ستمبر کو صفدریہ گرلز ہائی اسکول کنونشن ہال میں منعقدہ تقریب کی صدارت جناب ہمایوں علی مرزا سکریٹری اسکول نے کی اور اعلان کیا کہ 2034ء میں اسکول کی صد سالہ تقاریب کا بڑے پیمانے پر اہتمام کیا جائے گا اور صفدریہ اسکول المنائی کو شرکت کی دعوت دی جائے گی۔ ڈاکٹر تراب علی خاں نے اسکول کے قیام کے پس منظر پر روشنی ڈالی۔ ڈاکٹر رئوف خیر نے طالبات کو تلقین کی کہ وہ والدین اور ٹیچرس کا احترام کریں۔ ان کے فرماں بردار رہیں۔ انہوں نے کہا کہ حیدرآباد تہذیب اور شائستگی کا گہوارہ ہے۔ اسے اپنائیں اور اپنے اسکول کا نام روشن کریں۔ سید خالد شہباز سی ای او میڈیا پلس نے مہمانِ خصوصی کی حیثیت سے خطاب کرتے ہوئے طالبات کو ان کی بہترین تعلیمی کارکردگی پر نقد انعامات کے لئے مبارکباد پیش کی۔ انہوں نے کہا کہ ہر طالبہ کو بہتر مستقبل کے خواب دیکھنے چاہئیں اور ان خوابوں کو پورا کرنے کے لئے محنت کرنی چاہئے۔ انہوں نے مختلف شعبہ حیات سے تعلق رکھنے والی خواتین کی کامیابی اور ترقی کی مثال بھی دی۔ محترمہ تجمل فاطمہ تاج نے اپنا کلام پیش کیا۔ طالبات نے غوثیہ سلطانہ اور صغری ہمایوں مرزا کا منظوم کلام پیش کیا۔
