چندی گڑھ۔ پنجاب کے وزیر صنعت سندر شام اروڑہ نے کورونا کی دوسری لہر کے برے اثرات کے مدنظر ریاست کی صنعتوں کو ہر ممکن مدد اور تعاون فراہم کرانے کا یقین دلایا ہے ۔ مسٹر اروڑہ نے یہاں صنعت کاروں کو مہاجر مزدوروں کی فلاح و بہبود اور حفاظت کے لئے ہر طرح کی سہولت فراہم کرانے کی بات کہی۔ انہوں نے کہاکہ ریاست میں کام کررہی صنعتی اکائیوں کو ریاستی حکومت نے کووڈ وبا کے دوران 2020میں بھی مکمل مدد فراہم کی تھی انہیں کووڈ بحران کا مقابلہ کرنے کے لائق بنایا۔ یہی نہیں بلکہ پنجاب کی صنعتوں نے کورونا سے بچاو کے لئے ملک کے لئے ضروری پی پی ای کٹوں اور ماسک بھی تیار کئے ۔ انہوں نے کورونا جیسے سنگین بحران کے وقت صنعتوں کے بے مثال کردار کی تعریف کرتے ہوئے کہاکہ موجودہ سال کے دوران میڈیکل آکسیجن کی بلارخنہ سپلائی یقینی بنانے کے لئے صنعتی اکائیوں نے اب میڈیکل آکسیجن کی پیداوار کرنے کی پیشکش کی ہے ۔ مسٹر اروڑہ نے کہاکہ تمام اضلاع میں متعدد صنعتی اکائیاں مہاجر صنعتی مزدوروں پر منحصر ہیں یہ اطمینان بخش بات ہے کہ ریاست میں مہاجر مزدوروں کے یہاں سے جانے کی کوئی خبر نہیں ہے جیسا کہ دوسری ریاستوں میں نظر آرہا ہے ۔ انہوں نے صنعت کاروں سے اپیل کی کہ وہ ووڈ کے اس مشکل وقت میں مہاجر مزدوروں سمیت اپنے تمام ملازمین کو دیکھ بھال کریں اور تمام صنعتی مزدوروں کو کووڈ وبا کے پھیلاو کو روکنے کے لئے جلد کووڈ ٹیکہ لگوائیں۔ مسٹر اروڑہ نے صنعتی شعبہ کو یقین دلایاکہ ریاستی حکومت کووڈ وبا میں ان کے بے روک ٹوک کام کاج کے لئے اسے ہر ممکن مدد اورسوہلت فراہم کرانے کے لئے پرعزم ہے ۔