نیویارک۔ صومالیہ کے دن بدن بگڑتے ہوئے سیاسی بحران پر اقوام متحدہ کی سلامتی کونسل نے ایک ہنگامی اجلاس طلب کیا، جس میں صورتحال پر گہری تشویش ظاہر کی گئی۔ امکان ظاہر کیا جا رہا ہے کہ موجودہ سیاسی بحران کے نتیجے میں وہاں کئی سال بعد ہونے والے انتخابات ملتوی ہو سکتے ہیں۔ صومالی صدر اور وزیر اعظم میں شدید اختلافات پائے جاتے ہیں۔ کونسل کے ارکان نے صومالیہ پر زور دیا کہ سیاسی اختلافات کو دور کیا جائے اور وسیع تر قومی مفاد کو ترجیح دی جائے۔ عالمی قوتوں کی کوششوں کے بعد مئی میں طے پانے والے سمجھوتے کے تحت صومالیہ میں آئندہ برس فروری میں انتخابات ہونے ہیں۔
