ضلع سرسلہ میں پہلے مرحلہ میں 7 زیڈ پی ٹی سی، 65 ایم پی ٹی سی نشستوں پر رائے دہی ہوگی
گمبھی راوپیٹ۔ سرسلہ 9 اکٹوبر(سیاست ڈسٹرکٹ نیوز) سرسلہ ضلع کلکٹر و الیکشن آفیسر ایم ہریتا نے بتایا کہ ریاستی الیکشن کمشنر کی ہدایت پر ضلع انتظامیہ مقامی اداروں کے انتخابات کے انعقاد کے لیے پوری طرح تیار ہے۔ ویملواڑہ اربن، ویملواڑہ رورل، بوئن پلی، چندورتی ایم پی ڈی او دفاتر اور رودرنگی گرام پنچایت دفتر میں نامزدگیوں کے حصول کے لیے کیے گئے انتظامات کا جمعرات کے روز انہوں نے معائنہ کیا۔اس موقع پر ضلع کلکٹر نے بتایا کہ ریاستی الیکشن کمشنر نے 29 ستمبر کو انتخابی شیڈول جاری کیا تھا۔ اس کے تحت ضلع میں پہلے مرحلے میں 7 زیڈ پی ٹی سی اور 65 ایم پی ٹی سی نشستوں کے لیے نامزدگیاں حاصل کی جائیں گی۔ انہوں نے کہا کہ ایم پی ڈی او دفاتر میں امیدواروں کی سہولت کے لیے ہیلپ ڈیسک قائم کیے گئے ہیں اور تمام تر انتظامات مکمل کرلیے گئے ہیں۔کلکٹر نے بتایا کہ انتخابات کے پیش نظر آر اوز اور اے آر اوز کو تربیت دی جاچکی ہے۔ زونل، منڈل افسران، ایم سی سی نوڈل افسران، ایف ایس ٹی اور ایس ایس ٹی ٹیموں کو مقرر کر کے ان کی تربیت بھی مکمل کرلی گئی ہے اور وہ اپنی ذمہ داریاں نبھا رہے ہیں۔ تمام آر او دفاتر میں امیدواروں کی رہنمائی کے لیے ہیلپ ڈیسک قائم کرنے، انتخابات سے متعلق مکمل معلومات فراہم کرنے اور نامزدگی کے تفصیلات ظاہر کرنے والے بورڈ لگانے کی ہدایت دی گئی ہے۔کلکٹر نے مزید بتایا کہ گرام پنچایت انتخابات ضلع میں دوسرے اور تیسرے مرحلے میں منعقد ہوں گے اور اس کے لیے بھی تمام تیاریاں مکمل کرلی گئی ہیں۔ پی اوز اور اے پی اوز کو ایک مرحلے کی تربیت دی جا چکی ہے اور ایک اور مرحلے کی تربیت جلد دی جائے گی۔اس موقع پر ویملواڑہ آر ڈی او رادھا بائی، متعلقہ منڈلوں کے ایم پی ڈی اوز، تحصیلدار، ایم پی اوز اور دیگر عہدیدار شریک تھے۔
