سدی پیٹ 2 جولائی (سیاست ڈسٹرکٹ نیوز)ضلع کلکٹر کے. ہیماوتی نے متعلقہ افسران کو ہدایت دی کہ ضلع میں موجود ریزروائرز کے ذریعے آئندہ پانی کی فراہمی کو یقینی بنانے کے لیے نہروں کے لیے زمین کے حصول (لینڈ ایکوزیشن) کے عمل کو جنگی سطح پر مکمل کیا جائے۔ آج ضلع کلکٹریٹ کے کانفرنس ہال میں کلکٹر نے ضلع ایڈیشنل کلکٹر عبد الحمید، آبپاشی اور ریونیو محکموں کے افسران کے ساتھ ایک جائزہ اجلاس منعقد کیا۔ اس موقع پر کلکٹر نے کہا کہ رنگا نائک ساگر، ملنّا ساگر، کونڈا پوچمّا ساگر، گورویلی اور تپاس پلی ریزروائرز سے مختلف پیکیجوں کے ذریعے ضلع کی ہر جھیل میں پانی بھرنے کے لیے درکار زمین کے حصول کے معاملات پر منڈل واری سطح پر تفصیلی بات چیت کی گئی۔ انہوں نے ہدایت دی کہ مختلف پیکیجز کے تحت زمین کے حصول کے لیے جاری کردہ فنڈز اور باقی ماندہ کام کی تفصیل گرام و منڈل سطح پر آر ڈی اوز مکمل معلومات کے ساتھ پیش کریں۔ کلکٹر نے کہا کہ اس عمل میں ریونیو عملہ اور سرویئرز کا کردار نہایت اہم ہے۔ انہوں نے کہا کہ ہر گاؤں میں تحصیلدار اور سرویئرز، آر ڈی اوز کے تعاون سے نہروں کے لیے زمین کے حصول کے عمل کو تیز رفتاری سے مکمل کریں۔ سرویئر کی طرف سے دی گئی رپورٹ کی بنیاد پر آبپاشی اجازت نامے فوری طور پر تحصیلدار کو دیے جائیں تاکہ کسانوں کو نقصان کا معاوضہ ادا کرکے زمین کو محکمہ کے قبضے میں لیا جا سکے، جس کے بعد نہروں کی تعمیر کا کام تیزی سے مکمل کیا جائے۔
کلکٹر نے مزید کہا کہ اگر زمین کے حصول کے عمل میں کسی قسم کی رکاوٹ پیش آئے تو مکمل منصوبہ بندی کے ساتھ اسے مؤثر طریقے سے مکمل کیا جائے۔ اس موقع پر ڈی آر او ناگراجمّا، گجویل اور حسین آباد کے آر ڈی اوز چندرکلا، رام موورتی، اسپیشل ڈپٹی کلکٹر برائے زمین حصول اور دیگر افسران نے شرکت کی۔
