کابل۔ طالبان حکومت نے پاکستان سے طورخم سرحد کھولنے کی درخواست کردی۔افغانستان میں تعینات پاکستانی سفیر منصور احمد خان نے صحافیوں کے اعزاز میں عشائیہ دیا، اس دوران صحافیوں سے غیر رسمی گفتگو میں انہوں نے کہا کہ پاکستان سفر کرنے والے افغان شہریوں کیلئے سرٹیفکیٹ کی شرط فی الحال برقرار ہے،کوشش کررہے ہیں جلد اس مسئلے کا حل نکالا جائے۔انہوں نے کہا کہ افغان شہریوں کو پاکستان سفر کرنے کیلئے وزارت داخلہ سے سرٹیفکیٹ ( اضافی اجازت نامہ) حاصل کرنا پڑتا ہے۔ انہوں نے بتایا کہ طالبان حکومت کا پاکستان سے طورخم بارڈر کے معاملہ پر اہم رابطہ ہوا ہے جس دوران افغان حکومت نے پاکستان سے طورخم سرحد کھولنے کی درخواست کی ہے، اس حوالے سے اعلیٰ سفارتی ذرائع کی جانب سے بھی تصدیق کی گئی ہے۔
