کابل ۔25 اپریل ۔( سیاست ڈاٹ کام ) افغانستان کے لئے امریکہ کے خصوصی نمائندے زلمے خلیل زاد نے تنظیم معاہدہ شمالی اوقیانوس(نیٹو) کے طالبانی جنگجوؤں سے دشمنی ختم کرنے اور افغانستان حکومت سے ملک میں جاری سیاسی بحران کو ختم کرنے کی اپیل کا خیر مقدم کیا ہے ۔ناٹو کی فیصلہ لینے والی یونٹ اٹلانٹک کونسل نے طالبان کی طرف سے کئے جانے والے تشدد سے ہوئے نقصانات کو ناقابل قبول قرار دیتے ہوئے تنظیم سے اسے ختم کرنے کی جمعہ کو اپیل کی تھی ۔ خلیل زاد نے ٹوئٹر پر لکھا، ناٹو کا یہ بیان ان اہم اقدامات پر مبنی ہے ، جو افغانستان میں امن اور استحکام کے لئے ضروری ہیں ۔ انہوں نے عالمی وبا کووڈ۔19 کے قہر کے دوران عوام کے مدد کے لئے جنگ بندی کی ضرورت کو دہراتے ہوئے طالبان سے تشدد کم کرنے کی اپیل کی ہے اور افغانستان حکومت سے سیاسی بحران کو ختم کرنے کے لئے کہا ہے۔ انہوں نے کہا کہ اس سمت میں تمام فریقوں کو زیادہ تیزی سے آگے بڑھنا چاہئے ۔ انہوں نے کہا کہ اس اپیل پر دونوں فریقوں کی جانب سے کئے جانے والے فیصلے پر انحصار کرے گا کہ افغانستان آگے بڑھے گا یا لڑا ئی میں ہی رہے گا ۔انہوں نے کہا کہ امریکہ اور طالبان کے درمیان ہوئے معاہدے نے افغانستان کو تاریخی موقع فراہم کیا ہے ۔امریکہ اس کے اتحادی ملک اور پوری بین الاقوامی برادری اور افغانستان کے رہنماؤں سے اپنے ملک اور اس کے شہریوں کو اہمیت دینے کی اپیل کر رہا ہے ۔
