نارائن پیٹ میں مفت طبی کیمپ کا انعقاد ، رکن ا سمبلی ڈاکٹر پرنیکا ریڈی کا خطاب
نارائن پیٹ 6/ اکتوبر (سیاست ڈسٹرکٹ نیوز)ٹی ایکس ہاسپٹل و لائنس کلب آف نارائن پیٹ کے زیر اہتمام ایس آر گارڈن ، نارائن پیٹ مستقر میں منعقدہ میگا ہیلتھ کیمپ و بچوں کے قلب کی اسکریننگ کیمپ کے موقع پر مہمان خصوصی کی حیثیت سے ڈاکٹر چٹم پرنیکا ریڈی نے شرکت کرتے ہوئے کیمپ کا افتتاح عمل میں لایا گیا۔ محترمہ ڈاکٹر چٹم پرنیکا ریڈی رکن ساز اسمبلی نارائن پیٹ نے خطاب کرتے ہوئے کہا کہ ڈاکٹرس سماج میں مثالی خدمات انجام دے رہے ہیں اور لوگوں کی صحت کی حفاظت کے لئے کوششیں کر رہے ہیں جبکہ بعض مقامات پردرندہ صفات لوگ ایسے ڈاکٹروں پر حملے کررہے ہیں جو کہ ایک قابل افسوس اور مذمت کے قابل ہیں۔ ڈاکٹر چٹم پرنیکا ریڈی نے کہا کہ طبی پیشہ بہت ہی مقدس پیشہ ہے اور میں خود بھی ایک ایم ایل اے ہونے کے ساتھ ساتھ ڈاکٹر بھی ہوں اور عوام کی خدمت میرا جذبہ ہے اور لائینس کلب آف نارائن پیٹ کے تحت ہونے والے کئی خدماتی پروگراموں میں بحیثیت ڈاکٹر حصہ لیا ہے۔ انہوں نے عوام الناس سے گزارش کی کہ ایسے خدماتی پروگراموں سے مستفید ہوں ۔ایم ایل اے نے اس موقع پر ٹی ایکس ہاسپٹل و لائنس کلب آف نارائن پیٹ کے منتظمین کو دلی مبارکباد پیش کی۔ بعد ازاں میڈیکل کیمپ میں مفت طبی خدمات انجام دینے والے ڈاکٹروں کو شال پوشی و میمورنڈم سے نوازا گیا۔اس پروگرام میں لائنس کلب کے ضلع گورنر ہری نارائن بھٹڈ، صدور راگھویندر ریڈی، بھیمایا گوڈ، لائنس ممبران اترم، بھیم چندر گوڈ، روی کمار گوڑ، مارکیٹ چیرمین شیوا ریڈی، سابق مارکیٹ چیرمین بنڈی وینو گوپال، کانگریس پارٹی ٹاؤن کے صدر ایم ڈی سلیم، قائدین منوہر گوڑ، گندے چندرکانت، ستیش گوڑ، کارتک، جونل سبھاش، بسا پورم وینکٹ راملو اور دیگر نے شرکت کی۔
