نئی دہلی 14 اگست (یواین آئی) وزیر دفاع راج ناتھ سنگھ نے جمعرات کو یہاں انڈمان و نکوبار جزائر کی قبائلی برادریوں کے 30 ذہین طلباء سے بات چیت کی اور ان سے کہا کہ وہ ملک کو طاقتور بنانے کے لیے کام کریں۔ وزارت دفاع نے کہا کہ یہ بچے انڈمان و نکوبار کمانڈ کے سات روزہ قومی یکجہتی ٹور ’’آروہن:آئی لینڈ ٹو دہلی‘‘ کے تحت یہاں آئے ہیں۔ یہ طلباء کل لال قلعہ میں یوم آزادی کی تقریبات کا بھی مشاہدہ کریں گے ۔ طلباء کے ساتھ بات چیت کے دوران وزیر دفاع نے انسانی اقدار کی اہمیت پر زور دیا اور انہیں فرد کی کردار سازی کا سب سے اہم پہلو قرار دیا۔ انہوں نے طلباء پر زور دیا کہ وہ انسانی اقدار پر قائم رہیں اور تعلیمی سرگرمیوں کے ساتھ ساتھ اپنی کردار سازی پر بھی یکساں توجہ دیں۔ راجناتھ سنگھ نے طلباء پر زور دیا کہ وہ اعتماد اور بے خوفی کے ساتھ ہر چیلنج کا مقابلہ کریں۔ انہوں نے طلباء کو آنے والے وقت میں ہندوستان کو سب سے طاقتور ممالک میں سے ایک بنانے میں اپنا حصہ ڈالنے کی ترغیب دی اور ان کی مستقبل کی کوششوں کے لئے نیک تمناؤں کا اظہار کیا۔ بات چیت کے دوران چیف آف ڈیفنس اسٹاف جنرل انیل چوہان اور چیف آف انٹیگریٹڈ ڈیفنس اسٹاف ایئر مارشل آشوتوش دکشت بھی موجود تھے ۔
‘اروہن دیپ سے دہلی’ کے سفر کا مقصد دور دراز جزیروں کے نوجوانوں کو ہندوستان کے بھرپور ثقافتی ورثے ، جدید انفراسٹرکچر اور تعلیمی مواقع سے آشنا کرنا ہے ۔ اس سفر نامے میں مشہور مقامات جیسے لال قلعہ، انڈیا گیٹ، قومی جنگی یادگار اور تاج محل کے ساتھ ساتھ دہلی ٹیکنالوجیکل یونیورسٹی اور نیشنل سائنس سینٹر جیسے اہم اداروں کے دورے شامل ہیں۔ یہ پروگرام قومی یکجہتی کو فروغ دینے اور جزائر کے مستقبل کے رہنماؤں کو بااختیار بنانے کے لیے حکومت کے عزم کی عکاسی کرتا ہے ۔
