حیدرآباد ۔ 3 ستمبر (سیاست نیوز) ان دنوں اسکول جانے والے طلبہ جن کے بستے کافی وزنی ہوتے ہیں جس کی وجہ سے ان میں کئی امراض کے خدشات ہمیشہ ہی رہتے ہیں جس میں خاص کر ریڑھ کی ہڈی کے مسائل اور اس کے ٹیڑھے ہونے کے امراض کا خدشہ بہت زیادہ پایا جاتا ہے۔ اس لئے اب اسوسی ایشن آف اسپائن سرجن آف انڈیا (اے ایس ایس آئی) کی جانب سے ملک بھر میں ایک مہم کا آغاز کیا گیا ہے جس کے تحت آئندہ دو برسوں کے دوران 1.5 لاکھ اسکولی طلبہ کے درمیان نہ صرف ریڑھ کی ہڈی کے امراض کی تشخیص کی جائے گی بلکہ اسکولی طلبہ میں ریڑھ کی ہڈی کے مسائل کے متعلق شعور بیداری مہم بھی شروع کی جائے گی۔ یہ اپنی نوعیت کی پہلی مہم ہے کیونکہ اس وقت ہندوستان میں 14 سال کی عمر سے کم کے طلبہ وزنی بستوں کو روزانہ گھر سے اسکول تک اٹھا کر لے جانے کی وجہ سے مسائل میں مبتلاء ہورہے ہیں۔ شہر حیدرآباد میں اے ایس ایس آئی نے کئی ایک اسکولوں کے ساتھ اس مہم کا آغاز کیا ہے جس میں تقریباً 10 ہزار طلبہ کا معائنہ کیا جائے گا۔ جن طلبہ کی تشخیص کی جائے گی ان کی تفصیلات جمع کرتے ہوئے اس پر تحقیقی مطالعہ بھی کیا جائے گا تاکہ اس قسم کے امراض میں نئی نسلوں کو مبتلاء ہونے سے بچانے کیلئے احتیاطی تدابیر کے علاوہ میڈیکل شعبہ کی خدمات بھی حاصل کی جائیں گی۔ یہاں اس بات کا تذکرہ بھی اہمیت کا حامل ہیکہ ریڑھ کی ہڈی کے بہتر انداز میں رہنے اور اس کی تفصیلات معلوم کرنے کیلئے بازار میں کئی ایک آلے دستیاب ہونے کے علاوہ موبائیل فون میں کئی اپلیکیشنس بھی موجود ہیں جن میں اسپولیو میٹر اور اینگل میٹر قابل ذکر ہیں۔ اس ضمن میں اظہارخیال کرتے ہوئے آئی ایس ایس آئی کے اسپائن سرویس اینڈ میڈیکل ڈائرکٹر ڈاکٹر ایچ ایس چھابرا نے کہا ہیکہ ریڑھ کی ہڈی کے مسائل کا ابتدائی مرحلہ میں معلوم کرلینا بہتر ہوتا ہے اور خاص کر 10 تا 14 سال کی عمر کے بچوں میں اس کے خدشات زیادہ ہوتے ہیں لہٰذا ملک بھر میں یہ مہم چلائی گئی ہے اور اب حیدرآباد میں طلبہ کی ریڑھ کی ہڈی کا معائنہ کیا جارہا ہے۔