بودھن ۔ 22 نومبر (سیاست ڈسٹرکٹ نیوز) خواتین کو سیاسی میدان میں پچاس فیصد تحفظات کی فراہمی کے لئے بی آر ایس پارٹی کی جانب سے شروع کی گئی تحریک کو جلا بخشنے شکیل عامر امیدوار حلقہ اسمبلی بودھن نے عملی طور پر خود پہل کرتے ہوئے ان کی اہلیہ عائشہ فاطمہ عامر کو اپنی انتخابی کمان سنھالنے کا موقع دیا۔ عائشہ عامر جو ایک چیرٹیبل ٹرسٹ کی چیرمین ہیں جنہیں عوام خاص کر غریب و متوسط طبقہ سے ربط پیدا کرنے کا خاصہ تجربہ ہے جس کا عائشہ عامر بھرپور استعمال کرتے ہوئے بی آر ایس پارٹی کے انتخابی منشور کو منظم طریقہ پر گھر گھر گھوم پھر کر اکثریتی و اقلیتی فرقہ کے خواتین سے ملاقاتیں کرکے بی آر ایس پارٹی کے منشور میں شامل فلاحی اسکیمات کی تشہیر کررہی ہیں چونکہ عام طور پر سیاسی جماعتوں کی جانب سے تیار کردہ انتخابی منشور مسلم خواتین تک پہنچانے بیشتر سیاسی جماعتیں خصوصی تشہیری مہم نہیں چلاتی لیکن عائشہ عامر نے یہ بیڑہ اٹھایا۔ عائشہ عامر تیسری مرتبہ اپنے شوہر کو رکن اسمبلی بودھن منتخب کرنے ان تھک مہم جاری رکھے ہوئے ہیں۔
