راولپنڈی۔16 ڈسمبر (سیاست ڈاٹ کام ) پاکستانی ٹیم کے اوپنرعابد علی نے نیا عالمی ریکارڈ قائم کردیا اور وہ سری لنکا کے خلاف ٹسٹ میچ میں سنچری کی بدولت ٹسٹ اور ونڈے میں اپنے پہلے ہی مقابلے میں سنچری بنانے والے دنیا کے پہلے بیٹسمین بن گئے ہیں۔ سری لنکا کے خلاف راولپنڈی میں منعقدہ پہلے ٹسٹ میچ کے ذریعے پاکستان میں انٹرنیشنل کرکٹ کی واپسی ہوئی لیکن بارش نے رنگ میں بھنگ ڈالتے ہوئے میچ کے تقریباً تین دن کا کھیل ختم کردیا تاہم عابد علی نے اس یادگار موقع سے فائدہ اٹھاتے ہوئے ناصرف پاکستان بلکہ دنیائے کرکٹ میں نئی تاریخ رقم کردی۔ ڈومیسٹک کرکٹ میں رنز کے ڈھیر لگانے والے عابد علی نے رواں سال ونڈے کرکٹ میں موقع ملنے پر آسٹریلیا جیسی مضبوط حریف کے خلاف اپنے پہلے ہی میچ میں سنچری اسکور کردی تھی۔ تاہم یہ سنچری بھی ان کے کام نہ آئی اور انہیں ورلڈ کپ اسکواڈ سے خارج کردیا گیا جبکہ شائقین کے مستقل اصرار کے باوجود انہیں ٹسٹ اسکواڈ کا حصہ نہیں بنایا گیا۔ دورہ آسٹریلیا میں بدترین شکستوں کے بعد سلیکٹر اور ہیڈ کوچ مصباح الحق انہیں ٹیم میں شامل کرنے پر مجبور ہو گئے اور عابد علی نے پہلا ہی مقع ملنے پر شاندار سنچری اسکور کردی۔ ٹسٹ کرکٹ کی تقریباً ڈیڑھ سو سال پرانی تاریخ اور ونڈے کرکٹ کی 48 سالہ تاریخ میں کوئی بھی بیٹسمین دونوں فارمیٹ میں پہلے ہی مقابلے میں سنچری اسکور کرنے کا عالمی ریکارڈ نہ بنا سکا۔ عابد علی نے ٹسٹ کے پہلے ہی مقابلے میں سنچری اسکور کرنے والے پاکستان کے 12ویں کھلاڑی بن گئے۔ اس فہرست میں سب سے پہلے بلے باز خالد عباداللہ تھے جنہوں نے 166 رنز کی اننگز کھیلی تھی۔ اس کے علاوہ جاوید میانداد، سلیم ملک، محمد وسیم، علی نقوی، اظہر محمود، یونس خان، توفیق عمر، یاسر حمید(دونوں اننگز میں سنچری)، فواد عالم اورعمر اکمل بھی یہ کارنامہ انجام دے چکے ہیں۔
