کراچی۔21 ڈسمبر( سیاست ڈاٹ کام ) اوپنر عابد علی کی ریکارڈ ساز سنچری کی بدولت کراچی ٹسٹ کے تیسرے دن پاکستان نے اپنی دوسری اننگز میں سری لنکا کے خلاف 2 وکٹوں کے نقصان پر 395 رنز بنالئے ہیں اور اسے 315 رنز کی سبقت حاصل ہوچکی ہے۔ نیشل کرکٹ اسٹیڈیم کراچی میں پاکستان اور سری لنکا کے درمیان کھیلی جارہی ٹسٹ سیریز کے دوسرے اورآخری میچ کے تیسرے دن پاکستان نے 57 رنز پر اپنی نامکمل اننگزکا آغاز کیا تو عابد علی 32 جبکہ شان مسعود 21 رنز پر کھیل رہے تھے، دونوں کھلاڑیوں نے بڑے ذمہ دارانہ انداز میں اپنی اننگز کو آگے بڑھایا اور سب سے پہلے سری لنکا کی80 رنزکی برتری کو ختم کیا۔ اسی دوران عابد علی اور شان مسعود نے سنچریاں اسکورکرلیں۔ 278 رنز کی اوپننگ پارنٹرشپ کو لاہیروکمارا نے شان مسعود کی وکٹ لے کر توڑا۔ شان مسعود نے 135 رنز بنائے جب کہ عابد علی 174 رنز بناکر آؤٹ ہوئے۔اظہر علی اور بابر اعظم نے اننگزکو آگے بڑھایا اور کھیل ختم ہونے تک پاکستان نے 2 وکٹوں کے نقصان پر 395 رنز بنا لئے۔ اس طرح پاکستان کی سری لنکا کے خلاف برتری 315 رنز کی برتری حاصل ہوگئی ہے۔دن کے اختتام پر کپتان اظہر علی 57 اور بابر اعظم 22رنز بناکر وکٹ پر موجود ہیں۔ واضح رہے کہ پاکستانی ٹیم پہلی اننگزمیں 191 رنز اور سری لنکا 271 رنز بنائے ہیں۔
