ریاض: سعودی عرب میں الزمازمہ کمپنی نے عازمین حج کی رہائش تک آب زمزم کی بوتلیں مسلسل پہنچانے کیلئے ای پلیٹ فارم متعارف کرایا ہے۔الزمازمہ کمپنی کے نائب سربراہ ریان زمزمی نے بتایا کہ ’زمزم پلیٹ فارم کے ذریعہ عازمین حج کی رہائش کے پتے کا اندراج ہو گا اور تمام ڈیٹا محفوظ کیا جائے گا۔‘انہوں نے کہا کہ ’وزارت حج و عمرہ کے سنٹرل حج پورٹل کے ذریعہ ڈیٹا کی تصدیق کی جائے گی۔‘انہوں نے مزید کہا کہ ’عازمین کی رہائش کی ’ڈیجیٹل ہاؤس نمبرنگ‘ ہو گی۔ آب زمزم کی فراہمی کے حوالہ سے پورے حج سیزن میں اسی ای پلیٹ فارم پر انحصار کیا جائے گا۔‘ یہ پلیٹ فارم انٹرنیٹ کے بغیر بھی کام کرے گا تاکہ کسی تاخیر کے بغیر زمزم کی فراہمی کا سلسلہ جاری رہ سکے۔ الزمازمہ کمپنی کے نائب سربراہ کا کہنا تھا کہ ’عازمین کو اپنی رہائش پر آب زمزم کی وصولی یقینی بنانے کیلئے ضروری ہوگا کہ پہلے ای پلیٹ فارم پر اندراج کرائیں۔
پھر کنٹرول سنٹر سے رابطہ کریں پھر انہیں ایک تصدیقی پیعام موصول ہو گا۔‘’عازمین حج کے انچارج اور گاڑی کے ڈرائیور کے درمیان تعاون سے زمزم کی فراہمی عمل میں لائی جائے گی۔ ہر 8 گھنٹے میں آب زمزم کی فراہمی کے حوالے سے رپورٹ جاری کی جائے گی۔‘
