کاماریڈی کے چھوٹے گاؤں پلونچا کے پیدائشی سمیرعلی کی ویراٹ کوہلی سے مشابہت
کاماریڈی ۔ 3 مارچ ۔ ( سیاست ڈسٹرکٹ نیوز ) بسا اوقات لوگ اُنہیں دیکھ کر چونک اٹھتے ہیں اور بے ساختہ کہہ دیتے ہیں کہ یہ تو ویراٹ کوہلی ہیں۔ یہی غیر معمولی مشابہت شیف سمیر علی کی پہچان بن چکی ہے حتیٰ کہ وہ اشتہاری فلموں میں ویراٹ کوہلی کے باڈی ڈبل کے طور پر بھی کام کر چکے ہیں۔ تاہم ان کی اصل شناخت ایک محنتی اور باصلاحیت شیف، فٹنس اور فیشن ماڈل کی ہے جنہوں نے سخت حالات کے باوجود اپنی الگ پہچان قائم کی۔ضلع کاماریڈی کے ایک چھوٹے سے گاؤں پلونچا میں پیدا ہونے والے سمیر علی کا سفر آسان نہیں تھا۔ محدود وسائل اور اس شعبے میں کسی خاندانی پس منظر کے بغیر انہوں نے دسویں جماعت کا امتحان پانچ مرتبہ دیا اور تعلیمی مشکلات کا سامنا کیا۔ ابتدا میں ان کا خواب کرکٹر بننے کا تھا، مگر ذاتی مسائل کے باعث یہ خواہش ادھوری رہ گئی۔ اس کے باوجود انہوں نے ہمت نہیں ہاری اور زندگی کا رخ بدلنے کا عزم کیا۔انہوں نے اپنے کیریئر کا آغاز بطور کچن اسسٹنٹ کیا اور بنگلورو کے ایک اطالوی ریستوراں میں شیف میکس اورلاتی کی نگرانی میں کھانا پکانے کے فن سے عملی شناسائی حاصل کی۔ بعد ازاں انہوں نے Olive Bar & Firangi Paani Kitchen، اور Café Mangii جیسے معروف ریستورانوں میں خدمات انجام دیتے ہوئے عالمی کھانوں میں مہارت حاصل کی۔ وہ فخر سے کہتے ہیں کہ انہیں شیف ہونے پر خوشی اور اطمینان حاصل ہے۔ تلگو شخصیات اور حیدرآباد کی کاروباری برادری کے ساتھ ان کا اشتراک ان کے بڑھتے ہوئے اثر و رسوخ کا مظہر ہے۔ اس وقت وہ حیدرآباد میں مقیم ہیں اور Airlive Pub سے وابستہ ہونے کے ساتھ ساتھ بطور فری لانس شیف کنسلٹنٹ بھی خدمات انجام دے رہے ہیں۔فٹ شیف علی کا ایک چھوٹے گاؤں سے ایک باوقار شیف، فٹنس کے شوقین اور ماڈل بننے تک کا سفر اس حقیقت کی روشن دلیل ہے کہ عزم و حوصلہ خوابوں کو حقیقت میں بدل سکتا ہے۔ وہ نوجوانوں کو پیغام دیتے ہیں کہ عمر محض ایک عدد ہے اور مسلسل محنت ہی کامیابی کی کنجی ہے۔ انہیں انسٹاگرام پر @fitchefali اور یوٹیوب پر @fitchefaliofficial کے ذریعے بھی فالو کیا جا سکتا ہے، جہاں وہ اپنی پیشہ ورانہ اور فٹنس سرگرمیوں کی جھلکیاں شیئر کرتے ہیں۔
