ممبئی: بالی ووڈ کے فلمسازوں نے ماں کے مضبوط کردار کو اپنی فلموں میں اچھی طرح سے پیش کیا ہے اور کئی بار ایسا بھی ہوا ہے کہ فلمیں ماں کے مضبوط کردار کی وجہ سے ہی ناظرین کو اپنی طرف متوجہ کرنے میں کامیاب ہوئی ہیں۔کبھی ماں کے لیے وقف، کبھی مثبت، کبھی جدوجہد اور کبھی دوستانہ طورپر سلور اسکرین پر پیش کیا گیا ہے ۔ کردار کا انداز جو بھی رہا ہو، لیکن ان تمام آن اسکرین ماؤں نے ہمیشہ اپنی الگ پہچان چھوڑی ہے ۔ کئی بار فلموں میں ان کے کرداروں نے ہی انہیں سب سے زیادہ متاثر کیا ہے ۔ فلم سازوں نے اسکرین پر ماں کے معنی کو زیادہ بہتر انداز میں پیش کرنے کی کوشش کی ہے ۔بالی ووڈ میں جب بھی ماں کے کردار کا ذکر ہوتا ہے تو نروپا رائے کا نام ضرور آتا ہے ۔ اس طرح سے انہیں فلم انڈسٹری کی آئیڈیل ماں سمجھا جاتا ہے ۔ اس کے علاوہ انہیں امیتابھ بچن کی آن اسکرین ماں بھی کہا جاتا ہے ۔ انہوں نے کئی فلموں میں امیتابھ کی ماں کا کردار ادا کیا ہے ۔ بالخصوص فلم ‘دیوار’، ‘خون پسینہ’، ‘مقدر کا سکندر’، ‘امر اکبر انتھونی’، ‘سہاگ’ جیسی فلموں میں امیتابھ کی ماں کا بہترین کردار ادا کیا ہے ۔1957 میں ریلیز ہونے والی فلم ‘مدر انڈیا’ میں نرگس کا کردار کون بھول سکتا ہے ۔ اس فلم میں نرگس نے سنیل دت اور راجندر کمار کی ماں کے کردار کو زندہ کیا تھا۔ اس فلم میں نرگس نے ایک ایسی ماں کا کردار ادا کیا جو اپنے بیٹے کی ناانصافی پر اسے جان سے مارنے سے بھی دریغ نہیں کرتی۔ اس فلم میں نرگس کو بہترین اداکارہ کے فلم فیئر ایوارڈ سے نوازا گیا۔
