ممبئی ، 9 جولائی (یو این آئی) بالی ووڈ اداکارہ عالیہ بھٹ کی سابق پرسنل اسسٹنٹ ویدیکا پرکاش شیٹی کو مالی بے ضابطگیوں کے سنگین الزامات پر جوہو پولیس نے بنگلورو سے گرفتار کر لیا ہے ۔ پولیس کے مطابق ویدیکا پر الزام ہے کہ اس نے عالیہ کے پروڈکشن ہاؤس ’ایٹرنل سنشائن پروڈکشنز پرائیویٹ لمیٹڈ‘ اور ذاتی بینک اکاؤنٹس سے مجموعی طور پر 77 لاکھ روپے کا فراڈ کیا، جو مئی 2022 سے اگست 2024 کے درمیان انجام پایا۔ پولیس نے یہ گرفتاری عالیہ کی والدہ سونی رازدان کی شکایت پر درج مقدمے کی تحقیقات کے بعد عمل میں لائی۔ پانچ ماہ کی مسلسل تلاش کے بعد جوہو پولیس نے ملزمہ کو بالآخر بنگلورو سے گرفتار کیا اور عدالت میں پیش کیا۔ پولیس ذرائع کا کہنا ہے کہ تفتیش کے دوران مزید اہم اور حیران کن انکشافات سامنے آسکتے ہیں، جس کی بنیاد پر مزید کارروائی کی جا رہی ہے ۔ ابھی تک عالیہ بھٹ یا ان کی ٹیم کی جانب سے اس معاملے پر کوئی باضابطہ بیان سامنے نہیں آیا ہے ۔
