کراچی ۔11 مئی (سیاست ڈاٹ کام) پاکستانی کرکٹرز کے سنٹرل کنٹریکٹ کا اعلان رواں ہفتے متوقع ہے لیکن کئی نامور کھلاڑیوں کا معاہدہ خطرے میں ہے۔ ٹسٹ کرکٹ سے الگ ہونے والے محمد عامر اور وہاب ریاض کو سی کیٹگری دینے یا پھر کنڑیکٹ سے خارج کیے جانے کا قومی امکان ہے۔کرکٹرز کے سنٹرل کنٹریکٹ کی معیاد 30 جون کو ختم ہو رہی ہے تاہم موجودہ حالات میں غیر یقینی کی صورت حال کے خاتمے کے لئے جلد اعلان کا فیصلہ کیا گیا ہے۔ذرائع کے مطابق سنٹرل کنٹریکٹ میں کھلاڑیوں کے معاوضوں میں کٹوتی یا انہیں برقرار رکھنے کی بجائے اضافہ کیا جائے گا، گزشتہ برس 19 کرکٹرز کو سنٹرل کنٹریکٹ دیا گیا تھا لیکن اب امکان ہے کہ یہ تعداد کم کی جا سکتی ہے۔ ریڈ بال کرکٹ سے الگ ہونے والے محمد عامر اور وہاب ریاض کو معاہدے سے بھی خارج کرنے پر غور ہے اور اگر یہ دونوں فاسٹ بولر جگہ برقرار رکھنے میں کامیاب ہوئے تو انہیں سی کیٹگری میں رکھا جائے گا۔
