کراچی ۔18 ڈسمبر (سیاست ڈاٹ کام ) پاکستانی ٹیم کے ہیڈ کوچ اور چیف سلیکٹر مصباح الحق نے ٹسٹ کرکٹ سے کنارہ کشی اختیار کرنے والے فاسٹ بولروں محمد عامر اور وہاب ریاض پر برہمی کا اظہار کیا ہے۔ رواں سال 27سالہ محمد عامر نے محدود اوورز کی کرکٹ میں کیریئر کو طوالت دینے کے لیے ٹسٹ کرکٹ سے ریٹائرمنٹ کا اعلان کردیا تھا۔اس کے بعد وہاب ریاض نے بھی عامر کے نقش قدم پر چلتے ہوئے بورڈ سے درخواست کی تھی کہ انہیں ٹسٹ میچوں کے لیے زیر غور لایا جائے کیونکہ وہ محدود اوورز کی کرکٹ پر توجہ مرکوز کرنا چاہتے ہیں۔ مصباح الحق نے کراچی میں پریس کانفرنس سے خطاب کرتے ہوئے کہا کہ میڈیا کو ڈومیسٹک کرکٹ میں کارکردگی دکھانے والے کھلاڑیوں کی ضرور حمایت کرنا چاہیے، یہ بہت ضروری ہے لیکن ساتھ تنقید کرنے سے پہلے میڈیا کو یہ بھی سوچنا چاہیے کہ ٹیم کی ضرورت کون سے کھلاڑی ہیں۔ انہوں نے کہا کہ میں مستقبل کو مدنظر رکھ کر منصوبہ بندی کر رہا ہوں اور اسی مناسبت سے ٹیم کا انتخاب کیا جا رہا ہے، اگر ہم ایک یا دو سیریز کے لیے سوچ کر ٹیم منتخب کروں گا تو چند سال بعد میرے بعد آنے والوں کو اسی قسم کے حالات کا سامنا کرنا پڑے گا جس طرح کے حالات کا ہمیں سامنا کرنا پڑ رہا ہے۔ ایک سوال کے جواب میں ہیڈ کوچ نے دونوں کھلاڑیوں پر برہمی کا اظہار کرتے ہوئے کہا کہ ہم ان کھلاڑیوں پر اتنی سرمایہ کاری کرتے ہیں اور جب ملک کو ترجیح دینے کا وقت آتا ہے تو وہ چھوڑ کر ادھر ادھر چلے جاتے ہیں، یہ صحیح طریقہ کار نہیں ہے۔ یاد رہے کہ آسٹریلیا کے خلاف ٹسٹ سیریز میں پاکستانی ٹیم کو دونوں تجربہ کار فاسٹ بولروں کی کمی شدت سے محسوس ہوئی جہاں دونوں ٹسٹ میچوں میں پاکستانی بولرز صرف 13وکٹیں لے سکے اور پاکستانی ٹیم کو دونوں میچوں میں اننگز کی شکست کی خفت سے دوچار ہونا پڑا۔ مصباح نے کہا کہ پاکستان کرکٹ بورڈ(پی سی بی) جلد ہی ایک پالیسی بنائے گا جس کے نتیجے میں ٹسٹ کرکٹ چھوڑنے والے کرکٹرز کی حوصلہ شکنی ہو گی۔ انہوں نے کہا کہ ہم سخت فیصلے کرنے کا سوچ رہے ہیں اور اس معاملے پر جلد پالیسی بنائیں گے کیونکہ بصورت دیگر پاکستان کرکٹ کو مستقبل میں مشکلات کا سامنا کرنا پڑ سکتا ہے، ہم ان پر بہت رقم خرچ کرتے ہیں لہٰذا انہیں پہلے پاکستان کے بارے میں کھیلنے کے لیے سوچنا چاہیے۔ انہوں نے نوجوان فاسٹ بولروں شاہین شاہ آفریدی اور نسیم شاہ سے اچھی کارکردگی کی امید ظاہر کرتے ہوئے کہا کہ یہ دنووں مستقل 140کلومیٹر فی گھنٹہ کی رفتار سے بولنگ کر رہے ہیں اور میچ ونر بنتے جا رہے ہیں، دونوں نے بہت کم کرکٹ کھیلی ہے لیکن ان کا مستقبل بہت روشن ہے جو پاکستان کرکٹ کے لیے مثبت چیز ہے۔
