ممبئی: رواں سال کے آغاز سے افواہیں گردش کر رہی تھیں کہ بالی ووڈ کے ’مسٹر پرفیکشنسٹ‘ عامر خان کو بنگلورو میں مقیم ایک خاتون سے تیسری بار پھر پیار ملا ہے اور وہ اس کے ساتھ تعلقات میں ہیں۔ اپنی 60ویں سالگرہ سے پہلے 13 مارچ کو عامر نے میڈیا کے ساتھ ملاقات میں آخر کار انکشاف کیا کہ یہ افواہیں نہیں بلکہ حقیقت ہے۔ انہوں نے اپنی نئی گرل فرینڈ گوری اسپراٹ کے بارے میں سب کو بتایا اور ان کے ساتھ اپنے رومانی تعلقات کا باقاعدہ اعلان کیا اور یہ بھی بتایا کہ وہ ایک ساتھ رہ رہے ہیں۔ اب سوشل میڈیا پر ایک ویڈیو سامنے آئی ہے جس کے بارے میں دعویٰ کیا جارہا ہے کہ عامر اور گوری نے گزشتہ ماہ کرکٹر عرفان پٹھان کی شادی کی سالگرہ تقریب میں ایک ساتھ شرکت کی تھی۔ وائرل ویڈیو میں عرفان کو اپنی اہلیہ صفا کے ساتھ اپنی شادی کی سالگرہ کا کیک کاٹتے دیکھا جا سکتا ہے۔ عامر خان میز پر جوڑے کے ساتھ شامل ہوئے اور خوشی سے ان کے لیے تالیاں بجائیں۔ جیسے ہی کیمرہ گھومتا ہے تقریب میں شریک دیگر لوگوں کو بھی دیکھا جا سکتا ہے۔ انٹرنٹ صارفین کا دعویٰ ہے کہ اس تقریب میں گوری بھی موجود تھی۔ ویڈیو میں گوری وہ عورت ہے جو دھاری دار ٹاپ پہنے اور عینک لگائی ہوئی عامر خان کے پیچھے کھڑی ہے۔ پریس میٹ میں عامر خان نے بتایا کہ ان کی گوری سے 25 سال قبل ملاقات ہوئی تھی لیکن ان کا رابطہ ختم ہوگیا۔ تاہم، دوبارہ ملاقات کے بعد انہوں نے رشتہ قائم کرنے کا فیصلہ کیا اور اب وہ ایک ساتھ رہ رہے ہیں۔ عامر نے پریس میٹ میں مذاق کے طور پر اپنی 2001 کی فلم لگان کا حوالہ دیتے ہوئے کہا کہ ’’بھوون کو اس کی گوری مل گئی ہے‘‘۔ فلم ’تارے زمین پر‘ کے اداکار نے اپنی گرل فرینڈ کو اپنے خاندان سے ملوایا جنہوں نے اس کا کھلے دل سے استقبال کیا جبکہ عامر خان نے حالیہ دنوں میں گوری کو شاہ رخ خان اور سلمان خان سے بھی ملوایا، جب وہ ان کی رہائش گاہ پر ان سے ملنے آئے تھے۔
