چندی گڑھ: پنجاب کے وزیر اعلی بھگونت مان نے دعویٰ کیا ہے کہ ریاست میں عام آدمی پارٹی (اے اے پی) کی حکومت بننے کے بعد سے سرمایہ کاری بڑھانے کی مسلسل کوششیں کی جا رہی ہیں۔ ایک پریس کانفرنس میں انہوں نے کہا کہ جب سے ہماری حکومت بنی ہے ہم پنجاب میں سرمایہ کاری کے مواقع بڑھانے پر مسلسل کام کر رہے ہیں، پنجاب میں ہر شعبے میں سرمایہ کاری کے اچھے مواقع موجود ہیں، ہمارے پاس نوجوان قوت ہے جو انتہائی ہنر مند ہے۔ پنجاب میں سرمایہ کاری لانے کے لیے بہت کوششیں کی ہیں۔ میں نے ذاتی طور پر جا کر بنگلور، چنئی، حیدرآباد اور ممبئی کے صنعتکاروں سے بات کی اور انہیں پنجاب آنے اور پنجاب میں سرمایہ کاری کرنے کی دعوت دی۔ عام آدمی پارٹی کی حکومت ان کے ساتھ مکمل تعاون کرے گی۔
