نئی دہلی: عام آدمی پارٹی ایم پی سنجے سنگھ کو آج ای ڈی نے گرفتار کرلیا۔ ای ڈی نے دہلی شراب کی پالیسی سے متعلق منی لانڈرنگ کیس میں کل صبح چھاپے مارنے شروع کر دیے تھے۔ پارٹی نے سنجے سنگھ کے خلاف کاروائی کو سیاسی قرار دیا ہے۔دہلی کے وزیر اعلی اروند کجریوال نے کہا کہ جیسے جیسے انتخابات قریب آئیں گے، تمام ایجنسیاں
جیسے ای ڈی، سی بی آئی، محکمہ انکم ٹیکس اور پولیس متحرک ہو جائیں گی۔ کل صحافیوں پر اور آج سنجے سنگھ کے گھر پر چھاپے مارے گئے۔ ایسے بہت سے چھاپے مارے جائیں گے، لیکن ڈرنے کی کوئی بات نہیں۔ ای ڈی نے راجیہ سبھا ممبر پارلیمنٹ سنجے سنگھ کو دہلی ایکسائز اسکام کیس میں گرفتار کر لیا۔اان کے گھر سے کئی کاغذات ضبط کیے گئے۔ طویل پوچھ گچھ کے بعد ای ڈی نے سنجے سنگھ کو آج شام تقریباً 5:30 بجے گرفتار کیا۔ سنجے سنگھ کا
نام ایکسائز پالیسی کیس کی چارج شیٹ میں بھی ہے۔منیش سیسودیا اس معاملے میں فروری سے جیل میں ہیں۔ اس سال جنوری میں ای ڈی نے اپنی چارج شیٹ میں سنجے سنگھ کا نام شامل کیا تھا۔ سنجے سنگھ نے اس کو لے کر کافی ہنگامہ کھڑا کر دیا تھا۔سنجے سنگھ نے دعویٰ کیا کہ ای ڈی نے غلطی سے ان کا نام شامل کیا ہے۔ جس پر ای ڈی نے جواب دیا کہ ان کی چارج شیٹ میں چار مقامات پر سنجے سنگھ کا نام لکھا گیا ہے۔
