لکھنؤ۔10 اپریل (سیاست ڈا ٹ کام) الیکشن کمیشن کے نوٹیفکیشن کے بعد اترپردیش میں پانچویں مرحلے کے تحت 14 پارلیمانی حلقوں کے لئے بدھ کو نامزدگی کا مرحلہ شروع ہوگیا۔ پانچویں مرحلے کے تحت 6 مئی کو یوپی میں جن سیٹوں پر انتخابات ہونے ہیں ان میں امیٹھی، رائے بریلی، لکھنؤ اور فیض آباد قابل ذکر ہیں۔ اس مرحلے کے تحت مرکزی وزیر راج ناتھ سنگھ(لکھنؤ)، یوپی اے کی چیئرپرسن سونیا گاندھی(رائے بریلی) اور کانگریس صدر راہل گاندھی(امیٹھی) کے قسمت کا فیصلہ ہوگا ساتھ ہی مذہبی اعتبار سے سرخیوں میں رہنے والے فیض آباد میں بھی اسی مرحلے کے تحت ووٹ ڈالے جائیں گے ۔سابق مرکزی وزیر جتن پرساد(دھورارا) اور سابق اترپردیش کانگریس کے صدر نرمل کھتری(فیض آباد) بھی اسی مرحلے کے تحت انتخابی میدان میں ہوں گے ۔ الیکشن کمیشن کے ذرائع کے مطابق اس مرحلے کے لئے نامزدگی کا مرحلہ 18 اپریل تک جاری رہے گا جبکہ کاغذات کی جانچ 20 اپریل کوہوگئی اور امیدوار 22 اپریل تک اپنے نام واپس لے سکیں گے ۔ جبکہ پانچویں مرحلے کے لئے 06 مئی کو 07:00 بجے سے شام 18:00 بجے تک ووٹ ڈالے جائیں گے۔ پانچویں مرحلے کے تحت جن پارلیمانی نششتوں پر انتخابات منعقد ہوں گے ان میں دھورارا، سیتا پور، موہن لال گنج، لکھنؤ، رائے بریلی، امیٹھی، باندا، فتح پور، کوشامبی، بارہ بنکی، فیض آباد، قیصر گنج، بہرائچ اور گوندہ شامل ہیں۔ پانچویں مرحلے کے ووٹنگ میں مجموعی رائے دہندگان کی تعداد 24709515 ہے جن میں سے 13259311مرد ووٹر ہیں جبکہ خاتون رائے دہندگان کی تعداد 11448883 ہے اور 1321 تیسری جنس کے ووٹر ہیں۔ جو کہ 28072 پولنگ بوتھ پر حق رائے دہی کا استعمال کریں گے ۔
