لاہور: پاکستان کے سابق آل راؤنڈر عبدالرزاق اور ہندوستانی اداکارہ تمنا بھاٹیہ کی سال 2013 میں ہوئی ملاقات شاید کچھ لوگوں کو یاد ہو۔ اس حوالے سے عبدالرزاق نے اپنے انٹرویو میں اس کا تذکرہ کرکے قارئین کو بھی حیران کردیا۔ گزشتہ روز معروف یو ٹیوبر نادر علی نے سابق عبدالرزاق کا دلچسپ انٹرویو کیا اور ان کے ماضی سے متعلق یادوں کو چھیڑا۔ اس موقع پر عبدالرزاق نے ہندوستانی اداکارہ تمنا کے ساتھ ویڈیو منظر عام پر آنے کا دلچسپ واقعہ سنایا۔ 2013 میں ان دونوں کی ایک ساتھ تصویر نے کھیل اور شوبز کے حلقوں میں ہلچل مچا دی تھی۔ عبدالرزاق نے بتایا کہ دبئی میں ایک اشتہار کی شوٹنگ کے دوران میری ملاقات ہندوستانی اداکارہ تمنا کے ساتھ ہوئی تھی، وہاں ان کی فیملی بھی موجود تھی، اور وہیں میری اُن کے والد سے ملاقات ہوئی، جس کی تصویر سوشل میڈیا پر وائرل ہوئی۔ سابق آل راؤنڈر نے کہا کہ شوٹنگ کے دوران مجھے معلوم ہوا تھا کہ تمنا کے والد مسلمان تھے جبکہ والدہ ہندو ۔ وہ اپنی والدہ کو فالو کرتی تھی۔ اینکر نے مزاحیہ انداز میں سوال کیا کہ کیا آپ کو انہوں نے پہچان لیا تھا؟ عبدالرزاق نے مسکرا کر کہا کہ میں پاکستانی ٹیم میں تھا، یہ 2013 کی بات ہے اور اس کے کچھ عرصے بعد اُن کی فلم ’ہمت والا‘ ریلیز ہونے والی تھی۔ عبدالرزاق کو دبئی کی ایک جیولری شاپ میں ساؤتھ انڈین اداکارہ تمنا بھاٹیہ کے ساتھ دیکھا گیا تو ہر طرف اس کا چرچا ہوگیا تھا اور ان کی شادی کی افواہیں زور پکڑنے لگی تھیں۔ تاہم حقیقت یہ تھی کہ عبدالرزاق اور تمنا بھاٹیہ اس جیولری شاپ کے افتتاح کیلئے آئے تھے ۔
