کراچی ۔نئی دہلی ۔7 ستمبر (سیاست ڈاٹ کام ) سابق ٹسٹ کرکٹر اور لیگ اسپنر عبدالقادر کے انتقال پر ہندوستان سمیت دیگر بیرونی کھلاڑیوں نے گہرے افسوس کا اظہار کیا ہے۔اسپن بولنگ کے جادوگر، گگلی کے موجد سابق ٹسٹ کرکٹر عبدالقادر 63سال کی عمر میں حرکت قلب بند ہونے کے سبب انتقال کر گئے، ان کی موت کی خبر سن کر جہاں پاکستان بھر کے کھلاڑی، سماجی و سیاسی شخصیات اور عوام گہرے دکھ میں ہیں وہیں غیر ملکی کھلاڑیوں نے بھی اْن کے انتقال پر افسوس کا اظہار کیا ہے۔ ٹوئٹر پر سابق کھلاڑی بشن سنگھ بیدی نے عبدالقادر کے انتقال پر افسوس کا اظہار کرتے ہوئے لکھا کہ عبدالقادر اب اس دنیا میں نہیں ہیں، کرکٹ کی دنیا میں اْن کی اسپن خدمات کو طویل عرصے تک یاد رکھا جائے گا۔ اس کے علاوہ آپ نے پاکستان میں جو دیگر خدمات انجام دیں وہ بھی یاد رہیں گی۔انہوں نے مزید لکھا کہ اللہ رحم کرے، عبدالقادر کے گھر والوں کو وہ دلی تعزیت پیش کرتے ہیں۔ سابق کپتان سچن تنڈولکر نے ٹوئٹ کیا اور عبدالقادر کی کھیلتے ہوئے ایک تصویر شائع کی اور ساتھ میں لکھا کہ انہیں وہ وقت یاد ہے جب انہوں نے عبدلقادر کے خلاف کھیلا تھا، وہ اپنے وقت کے بہترین اسپنرز میں سے ایک تھے۔ اْن کے اہل خانہ کو میں دلی تعزیت پیش کرتا ہوں۔ ہندوستانی کرکٹ ٹیم کے سابق کوچ اور کھلاڑی انیل کمبلے نے اپنے ٹوئٹر پیغام جاری کرتے ہوئے لکھا کہ انہیں عبدالقادر کے اچانک انتقال کی خبر سن کر افسوس ہوا، عبدالقادر ایک بہترین لیگ اسپنر تھے۔ سنجے سبرامنین نے ٹوئٹر پر لکھا کہ انہوں نے عبدالقادر کے ساتھ ایک لمبا عرصہ گزارا۔ وہ لاجواب بولر اور ایک بہترین لیگ اسپنر تھے۔ جنوبی افریقی اسپنر عمران طاہر نے ٹوئٹر پر اپنے پیغام میں کہا کہ انہیں اپنے گرو اور سرپرست عبدالقادر صاحب کے انتقال کا سن کر انتہائی دکھ ہوا۔ وہ ایک ایسے شخص تھے جو ہمیشہ نہ صرف کرکٹ بلکہ زندگی کے ہر موڑ پر میری رہنمائی کرتے تھے۔ عمران طاہر نے مزید لکھا کہ وہ بہت سے لوگوں کیلئے والد کی مانند تھے ، اْن کے حسن سلوک کی وجہ سے انہیں ہمیشہ یادرکھا جائے گا۔ اللہ انہیں جنت میں جگہ دے۔ انگلینڈ کرکٹ ٹیم کے سابق کھلاڑی فلپ ڈیفریٹاس نے لکھا کہ انہیں یہ سن کر بہت دکھ ہوا ہے کہ ایک بہترین لیگ اسپنر عبد القادر کا انتقال ہوگیا ہے۔ وہ عبدالقادر کے اہل خانہ سے تعزیت کرتے ہیں۔
