نوجوان کھلاڑی کی ترقی میں والدہ کا بڑا کردار
جموں۔ سن رائزرس حیدرآبادکے لئے کھیلنے والے جموں وکشمیر کے ضلع راجوری کے نوجوان کرکٹر عبد الصمد کے پہلے کوچ رندھیر سنگھ جموال نے کہا ہے کہ عبد الصمد ایک مایہ ناز بیٹسمین ہیں اورکرکٹ کے تمام فارمیٹس میں اپنی صلاحیتوں کا لوہا منوانے کی صلاحیت رکھتے ہیں۔یادرہے کہ عبد الصمد نے آئی پی ایل کے اپنے پہلے ہی میچ میں بہترین کارکردگی کا مظاہرہ کر کے دنیائے کرکٹ میں اپنا نام روشن کر دیا ہے ۔ جموال نے میڈیا کے ساتھ عبد الصمد کی صلاحیتوں پر اظہار خیال کرتے ہوئے کہا عبد الصمد ایک آل رائونڈ کھلاڑی ہیں اورکرکٹ کے تمام فارمیٹس میں آج کل آل رائونڈرس کی ہی زیادہ ضرورت ہے ۔انہوں نے کہا کہ عبد الصمد کرکٹ کے تمام فارمیٹس میں اپنی صلاحیتوں کا لوہا منوانے کی صلاحیت رکھتے ہیں۔ جموال نے عبد الصمد کے ان کی اکیڈیمی میں نیٹ سیشن کے ایام کو یاد کرتے ہوئے کہا عبد الصمد نے سال 2012 میں میری اکیڈیمی میں شمولیت اختیارکی تھی اور اس کے بعد انہوں نے انڈر 14، انڈر 16اور انڈر19 کرکٹ ٹورنامنٹس میں جموں وکشمیر کی نمائندگی کی۔انہوں نے کہا کہ ہندوستان کے سابق کرکٹر عرفان پٹھان نے جب جموں وکشمیر کرکٹ اسوسی ایشن کی ذمہ داری سنبھالی تھی اس نوجوان کھلاڑی کی کافی حوصلہ افزائی کی۔عبد الصمد کی کامیابی کا سفر اس دن سے شروع ہوا جب انہوں نے ٹی20 اور ڈومیسٹک کرکٹ میں مسلسل بہترین کارکردگی کا مظاہرہ کیا۔انہوں نے کہا کہ اگر ان کی آئی پی ایل میں کارکردگی مسلسل بہتر رہی تو وہ سیلکٹروں کی نظروں میں ضرور رہیں گے ۔دریں اثنا عبد الصمد کے والد فاروق احمد جو پیشے کے لحاظ سے ایک فزیکل ایجوکیشن ٹیچر ہیں انہوں نے کہا کہ میں عبد الصمد اور اس کے بڑے بھائی طیب فاروق کو ایک خانگی اکیڈمی میں بھیجنا چاہتا تھا لیکن مالی کمزوری کی وجہ سے میں ایسا نہیں کرسکا۔انہوں نے کہا کہ میں نے پھر عبد الصمد کو رندھیر سنگھ کی اکیڈمی میں ڈالا جہاں انہوں نے عبد الصمد کی بہترین تربیت کی۔والد نے عرفان پٹھان اورجموں وکشمیر کرکٹ اسوسی ایشن کی ٹیم کے کپتان پرویز رسول کا بھی شکریہ ادا کرتے ہوئے کہا کہ انہوں نے عبد الصمد کی صلاحیتوں کو نکھارا۔انہوں نے کہا کہ عبد الصمد کی کامیابی میں ان کی والدہ فرزانہ کوثرکا بھی بڑارول ہے ۔
