لکھنؤ: اومیش پال قتل کیس میں عتیق احمدکی بہن عائشہ نوری کو ملزم بنایا گیا ہے۔ عائشہ پر الزام ہے کہ اس نے اومیش پال کے شوٹرز کو فرار ہونے میں مالی مدد کی تھی۔ عائشہ کے شوہر کو پولیس پہلے ہی گرفتار کر چکی ہے، ان کے شوہر کو بھی انہی الزامات میں گرفتار کیا گیا ہے۔ اب پولیس عائشہ کو گرفتار کرنے کی کوشش کر رہی ہے۔پولس کی جانچ سے پتہ چلا ہے کہ 24 فروری کو امیش پال کے قتل کے بعد مفرور ملزم گڈو مسلم 5 مارچ کو میرٹھ میں عائشہ کے گھر پہنچا تھا۔ عائشہ اور اس کے ڈاکٹر شوہر اخلاق احمد نے مبینہ طور پر گڈو سے گرم جوشی سے ملاقات کی اور فرار ہونے میں اس کی مالی مدد کی۔اگلے دن یعنی 6 مارچ کو عائشہ نوری اپنی بیٹی عنزلہ نوری کے ساتھ الہ آباد پہنچیں۔ انہوں نے بھائی اشرف کی اہلیہ زینب فاطمہ کے ساتھ پریس کانفرنس کی تھی۔ انہوں نے کہا کہ میرے دونوں بھائی عتیق احمد اور اشرف بے گناہ ہیں اور ان کی جان کو خطرہ بھی ہے۔
عائشہ نے الزام لگایا تھا کہ کچھ سینئر پولیس افسران ان کے بھائیوں کے انکاؤنٹر کی سازش کر رہے ہیں۔6 مارچ کو ہی عائشہ کے شوہر اخلاق کی کار سندیپن گھاٹ تھانہ علاقے کے کوشامبی میں لاوارث پائی گئی تھی۔ چوکی انچارج ہررائے پور کرشنا کمار یادو اور سندیپن گھاٹ پولیس اسٹیشن کے سربراہ راکیش رائے اس کار کو تھانے لے آئے اور اسے لاوارث درج کرایا۔ جب ایس پی کو اس کا علم ہوا تو چوکی انچارج ہررائے پور کرشنا کمار یادو اور سندیپن گھاٹ پولیس اسٹیشن کے سربراہ راکیش رائے کو غفلت برتنے پر معطل کر دیا گیا۔
