صنعا ۔ یمن میں عدن انٹرنیشنل ایرپورٹ بین الاقوامی پروازوں کے لئے بحال کردیا گیا ہے کیونکہ قبل ازیں میزائل حملے کے بعد ایر پورٹ بندکردیاگیا تھا۔ حملے میں کم سے کم 27 افراد ہلاک اور 40 زخمی ہو ئے تھے۔ حملہ گزشتہ چہارشنبہ کو سعودی عرب سے آنے والی اس پرواز کے لینڈ کرنے کے فوراً بعد ہوا تھا جس میں یمن کی نئی کابینہ کے ارکان سوار تھے۔سعودی خبررساں ادارے ایس پی اے کے مطابق ایرپورٹ کی بحالی تقریب میں عدن کے گورنر احمد لملس، وزیر داخلہ ابراہیم حیدان، وزیر ٹرانسپورٹ عبدالسلام حمید، وزیر منصوبہ بندی و عالمی تعاون واعدباذیذب اور عدن میں عرب اتحاد افواج کے کمانڈر نایف العتیبی سمیت متعدد عہدیدار شریک ہوئے۔ سعودی عرب نے میزائل حملے سے عدن ایرپورٹ کو پہنچنے والے نقصانات اور تباہ شدہ مقامات کی اصلاح و مرمت ریکارڈ وقت میں انجام دی ہے۔گورنرعدن نے اس موقع پر صحافیوں سے گفتگو کرتے ہوئے کہا کہ ثابت قدمی کے مظاہرے پر ایرپورٹ کے عہدیداروں کو سلام پیش کرتے ہیں۔ ان کی کاوشوں کو قدرو منزلت کی نگاہ سے دیکھتے ہیں اور ایک بار پھر یہ جتانا چاہتے ہیں کہ عدن دہشت گردوں کے آگے نہیں جھکے گا۔ عدن امن کا علمبردار شہر ہے۔ عالمی برادری سے اپیل کرتے ہیں کہ وہ دہشت گردانہ حملے کی تحقیقات کرائے۔انہو ں نے کہا کہ آزمائش کی اس گھڑی میں ساتھ دینے والے تمام فریقوں کے شکر گزار ہیں۔ ہمارے شکریہ کے سب سے زیادہ حقدار ہمارے سعودی بھائی ہیں۔