بغداد۔عراق میں کورونا کا شکار دیالی صوبے کی خاتون رکن پارلیمنٹ غیدا کمبش گذشتہ روز وبا سے لڑتے ہوئے انتقال کرگئی۔غیدا سعید عبدالمجید عبدالحسین کمبش 1974ء کو بغداد میں پیدا ہوئیں۔ وہ اعلیٰ تعلیم یافتہ عراقی سیاست دانوں میں شمار کی جاتی تھیں۔ انہوں نے سیاسیات میں ڈاکٹریٹ کی ڈگری حاصل کر رکھی تھی۔ 2010ء کو عراقی پارلیمنٹ کی رکن منتخب ہوئیں۔قبل ازیں عراقی پارلیمنٹ کے اسپیکر محمد الحلبوسی نے 6 ارکان پارلیمنٹ کے کورونا کا شکار ہونے کی تصدیق کی تھی۔عراق میں حالیہ ہفتوں کے دوران کرونا کی وبا تیزی کے ساتھ پھیلی ہے۔ عراقی حکومت نے وبا کی روک تھام کیلئے موثر اقدامات کیے ہیں۔ فضائی سروس اور تعلیمی ادارے بند ہیں۔عراق میں وزارت صحت کے مطابق جمعرات کے روز 2170 افراد کرونا کا شکار ہوئے۔ جب کہ 103 افراد کی موت کی تصدیق کی گئی۔
