کئی افراد زخمی‘حادثہ کی تحقیقات کا حکم‘ ملک بھر میں تین دن کے سوگ کا اعلان
بغداد۔17؍جولائی ( ایجنسیز) عراق کے ایک شاپنگ مال میں شدید آگ لگنے سے 61 لوگوں کی زندہ جل کر موت ہو گئی۔ میڈیاکے مطابق یہ حادثہ عراق کے الکوٹ کے ایک سوپر مارکیٹ میںپیش آیا۔ تصویروں میں دیکھا جا سکتا ہے کہ عمارت کے بڑے حصے میں آگ لگی ہوئی ہے اور دھوئیں کا غبار نکل رہا ہے۔حادثے سے جڑا ایک ویڈیو بھی سوشل میڈیا پلیٹ فارم پر وائرل ہو رہا ہے جس میں پانچ منزلہ عمارت آگ کے شعلوں میں گھری ہوئی دکھائی دے رہی ہے جبکہ فائر بریگیڈ کی ٹیم آگ پر قابو پانے کی جدوجہد کر رہی ہے۔ واسط صوبہ کے گورنر محمد المیاہی نے میڈیا کو بتایا کہ ایک بڑے شاپنگ مال میں لگی اس آگ میں مرنے والوں کی تعداد تقریباً 61 ہو گئی ہے حالانکہ آگ لگنے کی صحیح وجہ ابھی سامنے نہیں آ سکی ہے لیکن گورنر نے کہا ہے کہ جانچ کے ابتدائی نتیجے 48 گھنٹوں کے اندر جاری کیے جائیں گے۔گورنر محمد المیاہی نے بتایا کہ آگ ایک ہائپر مارکیٹ اور ایک ریستوراں میں لگی۔ جب آگ لگی تب کئی لوگ کھانا کھا رہے تھے اور خریداری کر رہے تھے۔ گورنر نے بتایا کہ فائر بریگیڈ اہلکاروں نے کئی لوگوں کو بچایا اور آگ بجھائی۔ اس دردناک حادثے کی وجہ سے پورے ملک میں تین دنوں کے سوگ کا اعلان کیا گیا ہے۔ میڈیا کے مطابق گورنر محمد ال میاہی نے عمارت اور مال کے مالک کے خلاف مقدمہ دائر کر دیا ہے۔موصولہ اطلاع کے مطابق بڑی تعداد میں ایمبولنس کے ذریعہ جائے حادثہ سے نعشوں اور زخمیوں کو لے جایا گیا۔ بغداد سے 160 کلومیٹر جنوب۔مشرق میں واقع شہر کا ایک ہاسپٹل حادثہ متاثرین سے بھر چکا ہے۔ مال 5 دن پہلے ہی کھلا تھا۔ شروعاتی جانچ سے پتہ چلا کہ آگ عمارت کی پہلی منزل پر لگی تھی۔یہ حادثہ رات کے وقت پیش آیا۔ 11 افراد تاحال لاپتہ ہیں۔ حکام نے خدشہ ظاہر کیا ہے کہ مزید نعشیں ملبے تلے دبی ہو سکتی ہیں۔شہر کے محکمہ صحت کے ایک اہلکار نے بتایاکہ ہم نے 59 افراد کی شناخت کرلی ہے لیکن ایک نعش اتنی بری طرح جھلس چکی ہے کہ اس کی شناخت ممکن نہیں ہو سکی۔ نعشوں کوملبے کے نیچے سے نکالنے کی کوشش جاری ہے۔واضح رہے کہ اس سے پہلے 2023 میں عراق میں ایک شادی کی تقریب کے دوران بڑا حادثہ ہو گیا تھا۔ حادثے میں خوفناک آگ لگ گئی تھی جس میں 100 لوگوں کی موت ہو گئی تھی جبکہ 150 افراد زخمی ہوئے تھے۔