ریاض ۔18جون (سیاست ڈاٹ کام)سعودی عرب کی زیر صدارت عرب وزرائے سیاحت کے اجلاس میں مرحلہ وار سفری پابندی اٹھانے کا فیصلہ کیا گیا ہے۔ عرب وزرائے سیاحت کے ویڈیو اجلاس میں کہا گیا ہے کہ اس حوالے سے تمام عرب ممالک ایک دوسرے سے تعاون کریں گے اور نئے کورونا وائرس کے منفی اثرات سے محدود کرنے کے لیے احتیاطی تدابیر کی پابندی کریں گے۔ ویب سائٹ کے مطابق عرب وزرائے سیاحت کے اجلاس کی صدارت سعودی وزیر احمد الخطیب نے کی۔ اجلاس کا ایجنڈا کورونا وائرس کی وبا سے سیاحت پر پڑنے والے اثرات اور ان سے نمٹنے کے طور طریقوں پرمشتمل تھا۔عرب وزرائے سیاحت نے متعدد قراردادیں اورسفارشات منظور کیں جس میں کہا گیا ہے کہ سیر و سیاحت کے شعبے کے کارکنان کی صحت و سلامتی کو یقینی بنایا جائے گا۔سفارشات میں یہ بھی کہا گیا ہے کہ سیاحوں میں سیر وسیاحت کے حوالے سے اعتماد بحال کرنے والے اقدامات کیے جائیں گے۔ عرب ممالک کے درمیان داخلی سیاحت کو فروغ دیا جائے گا۔ وبا ختم ہونے پر غیرملکی سیاحوں کے لیے ترغیباتی پروگرام جاری کیے جائیں گے۔ اجلاس میں فیصلہ کیا گیا کہ سیاحت کا شعبہ خانگی اور سرکاری اداروں کے تعاون سے سیاحت کو پہنچنے والے نقصانات محدود کرنے کی کوشش کرے گا۔ بیان کے مطابق سیاحتی ملازمین کو بیروزگار ہونے سے بچایا جائے گا۔ سیاحتی ملازمین کی استعداد بڑھانے کیلئے تربیتی پروگرام منعقد کیے جائیں گے۔ تربیتی پروگراموں میں جدید ٹیکنالوجی کا استعمال بڑھایا جائے گا۔ زیادہ متاثرہ شعبوں خصوصا فضائی کمپنیوں اور سیاحتی کمپنیوں میں نئی اسامیاں پیدا کی جائیں گی۔
