ممبئی: عالمی سنیما پر انمٹ نقوش چھوڑنے والے ہندوستان کے لیجنڈ اداکار عرفان خان کسی تعارف کے محتاج نہیں۔لیکن کیا آپ جانتے ہیں کہ عرفان کا پہلا خواب اداکار بننا نہیں بلکہ کرکٹر بننا تھا۔تاہم ان کا یہ خواب پورا نہ ہوسکا اور بعد میں انہیں اداکاری کا شوق پیدا ہوا اور پھر اس میں مہارت حاصل کرکے دنیا کو حیران کردیا۔ ان کی برسی پر جانیے ان کی زندگی سے جڑی ایک دلچسپ کہانی۔خان 7 جنوری 1967 کو ٹونک، راجستھان میں ایک پشتون گھرانے میں پیدا ہوئے۔ خان کی والدہ سیدہ بیگم خان کا تعلق ٹونک سے تھا اور ان کے والد یاسین علی خان کا تعلق راجستھان کے ٹونک ضلع کے کھجوریا گاؤں سے تھا۔انکا ٹائروں کا کاروبار تھا۔ عرفان خان کو کرکٹ میں دلچسپی تھی اور وہ کرکٹ میں اچھے بھی تھے۔ یہاں تک کہ انہیں انڈر 23 زمرے میں ابھرتے ہوئے کھلاڑیوں کے لیے سی کے نائیڈو ٹرافی میں کھیلنے کے لیے منتخب کیا گیا تھا۔اس ٹورنامنٹ کو ہندوستان میں فرسٹ کلاس کیٹیگری کرکٹ کی طرف ایک قدم کے طور پر دیکھا جاتا ہے۔کرکٹ کے اچھے کھلاڑی ہونے اور سی کے نائیڈو ٹرافی کھیلنے کے لیے منتخب ہونے کے باوجود عرفان خان کا کرکٹر بننے کا خواب پورا نہ ہو سکا۔ جس کی وجہ پیسے کی کمی تھی۔ چونکہ عرفان کے والد کا ٹائروں کا کاروبار تھا۔سفری اخراجات ادا نہ کرنے کی وجہ سے وہ اس ٹرافی میچ میں شرکت نہیں کر سکے اور ان کا خواب ادھورا رہ گیا۔کچھ عرصے کے بعد انہوں نے اپنے ماموں کی وجہ سے اداکاری میں دلچسپی پیدا کی۔ ان کے ماموں جودھ پور میں تھیٹر آرٹسٹ تھے۔ انہوں نے خان کو جے پور میں تھیٹر کے مشہور فنکاروں سے ملوایا۔جس کے بعد انہوں نے شہر میں کئی اسٹیج پرفارمنس دی۔
