سڈنی ۔ 4نومبر (سیاست ڈاٹ کام ) پاکستان کرکٹ ٹیم کے فاسٹ بولر محمد عرفان سابق کپتان عمران خان کے بعد ٹیم کی نمائندگی کرنے والے معمر فاسٹ بولر بن گئے ہیں۔ آسٹریلیا کے خلاف 3 ٹی ٹوئنٹی میچز پر مشتمل سیریز کے پہلے میچ کے دوران پاکستان ٹیم کی نمائندگی کرتے ہوئے محمد عرفان کو یہ اعزاز حاصل ہوا۔ محمد عرفان 37 برس کی عمر میں آسٹریلیا کے خلاف سڈنی میں پاکستانی ٹیم کا حصہ بنے جبکہ عمران خان نے 1992 کے ورلڈکپ میں 39 برس کی عمر میں ٹیم کی نمائندگی کی تھی۔ عمران خان کے بعد کوئی بھی فاسٹ بولر ان کی عمر کے قریب بھی نہ پہنچ سکا، تاہم گزشتہ 27 برس کے دوران محمد عرفان 37 سال کی عمر میں ٹیم کی نمائندگی کرنے والے عمر رسیدہ کھلاڑی ہیں۔ پاکستان کی طرف سے سب سے عمر رسیدہ کھلاڑی کا اعزاز میران بخش کے پاس ہے جنہوں نے 1955 میں ہندوستان کے خلاف 47 برس کی عمر میں ٹسٹ میچ کھیلا تھا۔
