ایرنڈول جامع مسجد کو سیل کرنے ضلع کلکٹر کا عبوری حکم
ممبئی: مہاراشٹرا کے خاندیش علاقے کے ایرنڈول نامی شہر میں واقع 1610 سن عیسوی میں تعمیر جامع مسجد کو سی آرپی سی کی دفعہ 145 کے تحت سیل کئے جانے کا حکم جلگائوں کے ضلع کلکٹر نے گذشتہ روز جاری کیا، جس کے بعد سے علاقے کے مسلمانوں میں بے چینی پھیلی ہوئی ہے۔علاء الدین خلجی کے دور میںتعمیر کی گئی اس تاریخی مسجد میں مسلمان صدیوں سے پنج وقتہ نماز ادا کرتے آئے ہیں لیکن ضلع کلکٹر کے مسجد کو سیل کئے جانے کے عبوری حکم نامے کے بعد مسجد میں پنج وقتہ نماز کی ادائیگی خطرہ میں پڑ گئی ہے۔مسجد کے ٹرسٹیوںاور مقامی لوگوں سے ملی معلومات کے مطابق پانڈو واڑہ سنگھرش سمیتی نامی ہندوئوں کی ایک تنظیم نے مسجد پر اپنا دعوی پیش کرتے ہوئے یہ کہاکہ یہ مسجد پانڈوواڑہ تھی جسے منہدم کرکے مسجد کی تعمیر کی گئی تھی اور ان کی جگہ پر قبضہ کیا گیا۔ 18 مئی 2023 کو پانڈوواڑہ سمیتی کے صدر پرمدھوسدن دنڈوتے نے ضلع کلکٹر جلگائو ں میں ایک عرضداشت داخل کی اورکہا کہ پانڈوواڑہ کی ملکیت کی اراضی پر ناجائز قبضہ کیا گیا اور یہ قبضہ جامع مسجد ٹرسٹ نے کیا ہے ۔لہٰذا اراضی کی پیمائش کی جائے اور مسجد کو سیل کرنے کا حکم جاری کیا جائے۔ضلع کلکٹر جلگائوں امن متل نے 11 جولائی کو عرضی گذار ، جامع مسجد ٹرسٹ ، تحصیلدار اور محکمہ آثار قدیمہ کے نمائندوں کو سماعت کیلئے طلب کیا تھا۔ضلع کلکٹر نے فریقین کے دلائل کی سماعت کے بعد سی آر پی سی کی دفعہ 145 کے تحت عبوری حکم نامہ جاری کرتے ہوئے مسجد کو مہربند کرنے کا حکم دیا۔ ضلع کلکٹر نے 13 جولائی کو مہاراشٹرا وقف بورڈ کے نمائندے کو مسجد کے کاغذات کے ساتھ طلب کیا ہے۔ ضلع کلکٹر نے معاملے کی سنگینی کو دیکھتے ہو ئے علاقے میں سیکشن 144 بھی نافذ کرنے کا حکم دیا۔ ضلع کلکٹر نے 13 جولائی کی شام تک مسجد میں صرف دولوگوں کو نماز ادا کرنے کی اجازت کاحکم جاری کیا۔ضلع کلکٹر کی جانب سے مسجد کو سیل کرنے کا عبوری حکم نامہ جاری کرنے کے بعد جامع مسجد ٹرسٹ(ایڈہاک کمیٹی) کے نمائندوں نے جمعیتہ علماء ہند (ارشد مدنی) قانونی امداد کمیٹی کے سربراہ گلزار اعظمی اور قانونی مشیرایڈوکیٹ شاہد ندیم سے رابطہ قائم کیا اور ضلع کلکٹر کی کارروائی کے متعلق انہیں مطلع کیا۔ معاملے کی سنگینی کے مدنظر گلزار اعظمی نے مہاراشٹرا وقف بورڈ کے چیئرمین وجاہت مرزا سے رابطہ قائم کیا اور ان سے درخواست کی کہ وہ اس معاملے میں فوراً مداخلت کریں اور 13 جولائی کو ضلع کلکٹر کے روبرو سینئر وکیل کو کھڑا کریں جو ثبوت و شو اہد کی بنیاد پر بحث کرکے عبوری حکم نامے کو کالعدم قرار دینے کی کلکٹر سے درخواست کرے۔
، اس ضمن میں گلزار اعظمی نے چیئرمین وقف بورڈ کو ایک خط بھی لکھا۔چیئر مین وقف بورڈ نے گلزار اعظمی کو یقین دلایا کہ وہ ٹرسٹیوں کے مسلسل رابطہ میں ہیں اور ضلع کلکٹر کے سامنے وقف بورڈ کی جانب سے جامع مسجد ایرنڈول کی پیروی کی جائے گی۔