جموں: جموں وکشمیر کے ضلع اودھم پور سے تعلق رکھنے والی ایک 21 سالہ طالبہ نے آٹو رکشا چلا کر اپنے علیل والد کا ہاتھ بٹانا شروع کیا ہے بلکہ ضلع کی پہلی خاتون آٹو ڈرائیور بننے کا اعزاز بھی حاصل کیا ہے ۔ضلع اودھم پور کے ایک غریب گھرانے سے تعلق رکھنے والی بنجیت کور آٹو چلا کر گھر کی آمدنی بھی بڑھا رہی ہیں اور شام کے وقت پڑھائی کرکے بی کام کی ڈگری بھی کر رہی ہیں۔بنجیت کور کا کہنا ہے کہ جب کورونا کے پیش نظر نافذ لاک ڈاؤن کے باعث میرے والد، جو ایک نجی اسکول کی گاڑی چلاتے ہیں، بے روزگار ہوگئے تو میں نے آٹو چلا کر گھر میں روزی روٹی کا بند وبست کرنا شروع کیا۔انہوں نے میڈیا کو بتایاکہ میرے والد ایک خانگی اسکول کی گاڑی چلاتے تھے۔ کورونا لاک ڈاؤن کی وجہ سے وہ بھی بے روزگار ہوگئے ، گھر کا گذارہ مشکل ہوگیا تو میں نے آٹو چلانا شروع کیا تاکہ روزی روٹی کا بندو بست ہوسکے ۔
انھوں نے کہا کہ میں دن کے وقت آٹو چلا کر نہ صرف گھر کے گذارے کو چلاتی ہوں بلکہ لوگوں کی بھی اس طرح خدمت کرتی ہوں۔
