پرتھ۔12 ڈسمبر (سیاست ڈاٹ کام ) پاکستانی امپائر علیم ڈار نے دنیائے کرکٹ میں ریکارڈ بنادیا، وہ سب سے زیادہ ٹسٹ میچز میں امپائرنگ کے فرائض انجام دینے والے امپائر بن گئے ہیں۔ آج شروع ہوئے آسٹریلیا اور نیوزی لینڈ کا ٹسٹ میچ علیم ڈار کے لئے ریکارڈ بن گیا جوکہ ان کے کیریئر کا 129 واں انٹرنیشنل ٹسٹ میچ ہے۔ علیم ڈار سے پہلے ویسٹ انڈیز کے اسٹیوبکنر سب سے زیادہ ٹسٹ میچز میں امپائرنگ کر چکے ہیں۔ علیم ڈار ونڈے میچوں میں بھی ریکارڈ بنانے کے بہت ہی قریب ہیں۔ وہ اب تک 207 میچوں میں اپنے فرائض انجام دے چکے ہیں۔ جنوبی افریقہ کے روڈی کرٹزن سب سے زیادہ209 ونڈے میچوں میں امپائرنگ کرچکے ہیں۔ اس کے علاوہ علیم ڈار46 ٹی ٹوئنٹی انٹرنیشنل میچوں میں بھی بطور امپائر اپنی ذمہ داری انجام دے چکے ہیں۔علیم ڈار نے اپنے ریکارڈ سے متعلق خوشی کا اظہار کرتے ہوئے کہا ہے کہ کبھی سوچا بھی نہیں تھا کہ اتنا کچھ حاصل کرلوں گا، اہل خانہ کے تعاون کے بغیر یہ سب ممکن نہیں تھا۔ انہوں نے آئی سی سی اور پاکستان کرکٹ بورڈ کا بھی شکریہ ادا کیا۔ پاکستانی امپائر علیم ڈار 2009ء سے2011ء تک مسلسل تین مرتبہ آئی سی سی کے بہترین امپائر کا ایوارڈ بھی جیت چکے ہیں۔
