علی گڑھ؍ اتر پردیش 25 اکتوبر (ایجنسیز) یوپی کے علی گڑھ ضلع کے لودھا تھانہ علاقہ میں ہفتہ کو اس وقت کشیدگی پھیل گئی جب دو قریبی دیہاتوں کی پانچ مندروں کی دیواروں پر ’آئی لو محمد‘ لکھا ہوا پایا گیا۔
اطلاع ملتے ہی اعلیٰ پولیس عہدیدار فارنسک ماہرین اور پولیس کے تفتیشی کتوں کے ساتھ موقع پر پہنچ گئے۔ علاقہ میں بھاری پولیس فورس تعینات کر دی گئی ہے اور آس پاس کے سی سی ٹی وی فوٹیج کی جانچ جاری ہے۔ پولیس نے ابتدائی تفتیش کے بعد مستقیم، گل محمد، سلیمان، سونو، اللہ بخش، حمید اور یوسف سمیت 8 افراد کے خلاف مقدمہ درج کیا ہے۔ایس ایس پی نیرج کمار نے میڈیا سے گفتگو میں کہا کہ ہم اس واقعہ کو انتہائی سنجیدگی سے لے رہے ہیں، تمام پہلوؤں کی گہرائی سے جانچ ہو رہی ہے، کسی مجرم کو بخشا نہیں جائے گا۔ ان کا کہنا تھا کہ پولیس اس واقعہ میں زمین کے ممکنہ تنازعے کے زاویہ سے بھی تفتیش کر رہی ہے۔اسی دوران، اس واقعہ کی شکایت درج کرانے والے کرنی سینا کے رہنما گیانندر سنگھ چوہان نے مقامی پولیس پر غفلت برتنے کا الزام لگایا۔انہوں نے کہا کہ افسران نے اصل ملزمان پر کارروائی کرنے کے بجائے اطلاع دینے والے گاؤں کے رہائشی کو ہی حراست میں لے لیا۔ چوہان نے مزید دعویٰ کیا کہ پولیس نے معاملے کو ٹھنڈا کرنے کے لیے مندر کی دیواروں پر لکھے گئے نعرے مٹانے کی کوشش کی، جس سے مقامی لوگوں میں غصہ پھیل گیا۔فی الحال علاقہ میں حالات کشیدہ ضرور ہیں، لیکن پولیس فورس کی موجودگی میں صورتحال قابو میں بتائی جا رہی ہے۔ علی گڑھ پولیس نے شہریوں سے امن و امان برقرار رکھنے کی اپیل کی ہے۔
