اسلام آباد ۔27 فروری (سیاست ڈاٹ کام) پاکستان کے وزیر اعظم عمران خان نے سابق عظیم ویسٹ انڈین کے بیٹسمین اورکوئٹہ گلیڈی ایٹرزکے مشیر سر ویوین رچرڈز، آسٹریلیا کے سابق آل راونڈر شین واٹسن اورگریگ چیپل نے ملاقات کی جس میں وزیر اعظم نے پاکستان آنے پر کرکٹ لیجنڈز کا شکریہ ادا کیا۔ اسلام آباد میں وزیر اعظم عمران خان سے سابق ویسٹ انڈین عظیم کرکٹر سر ویوین رچرڈز، آسٹریلین آل راؤنڈر شین واٹسن اور سابق آسٹریلین کرکٹر گریگ چیپل نے ایوان وزیر اعظم میں ملاقات کی۔ ویوین رچرڈز، شین واٹسن اور گریگ چیپل پاکستان سوپر لیگ میں شرکت کے لئے پاکستان میں موجود ہیں۔ دوران گفتگو وزیر اعظم نے کرکٹرز سے خیریت دریافت کی اور پاکستان آمد پر ان کا شکریہ ادا کیا۔ ملاقات خوشگوار ماحول میں ہوئی اور عمران خان اور ویوین رچرڈز نے پرانے دورکی یادوں کو تازہ کیا۔ ویوین رچرڈز نے کہا کہ جب عمران خان کپتان تھے تو پاکستان اور ویسٹ انڈیز کے درمیان میچ ہمیشہ بہت دلچسپ ہوتے تھے اور پاکستان میں کرکٹ دوبارہ بحال ہوتے ہوئے دیکھنا انتہائی خوش آئند ہے۔ وزیر اعظم نے کہا کہ پاکستان میں عالمی کرکٹ کی بحالی کے لیے غیرملکی کرکٹرز کی خدمات کو ہمیشہ یاد رکھا جائے گا۔
