مکہ مکرمہ۔ وزیراعظم عمران خان نے اہلیہ کے ساتھ عمرہ کی سعادت حاصل کر لی،ان کے اعزاز میں طواف سے پہلے بیت اللہ کے دروازے خصوصی طور پر کھولے گئے تھے۔بیت اللہ کے دروازے کھول کر وزیراعظم عمران خان کو زیارت خاص کرائی گئی۔دریں اثنا وزیراعظم کے معاون خصوصی برائے سیاسی امور ڈاکٹر شہبازگل نے ٹوئٹر پر بتایا کہ وزیراعظم عمران خان اور خاتون اول بشری عمران نے عمرہ کی سعادت مکمل کی۔ انہوں نے بتایا کہ وزیراعظم اور ان کے وفد کے لیے خانہ کعبہ کا دروازہ خصوصی طور پر کھولا گیا۔ وزیراعظم اور خاتون اول اور وفد نے خانہ کعبہ کے اندر نوافل ادا کیے۔اس سے قبل وزیراعظم عمران خان نے ہفتہ کو اپنے وفد کے ہمراہ روضہ رسول صلی اللہ علیہ وسلم پر حاضری دی۔انہوں نے پاکستان کی ترقی و خوشحالی، امت مسلمہ کی یکجہتی، کورونا وبا سے نجات کے لیے خصوصی دعا کی۔وزیراعظم نے وفد سمیت مسجد نبوی صلی اللہ علیہ وسلم میں افطار بھی کیا اور نماز مغرب ادا کی۔
