اسلام آباد ۔23 مارچ (سیاست ڈاٹ کام ) پاکستان کرکٹ ٹیم کے سابق فاسٹ بولر شعیب اختر نے وزیراعظم عمران خان سے پنجاب کو بھی لاک ڈان کرنے کی درخواست کر دی۔ سوشل میڈیا پر اپنے ویڈیو پیغام میں راولپنڈی ایکسپریس شعیب اختر نے کہا کہ صفائی نصف ایمان تھا جس کو ہم بھول گئے، کورونا وائرس کے بعد سب کو یاد آ گیا کہ صفائی نصف ایمان ہے، اب صورت حال یہ ہے کہ بڑھتے معاملات کو دیکھتے ہوئے پاکستان کو کورونا وائرس کی زمرے2 میں ڈال دیا گیا ہے۔ ماضی کے سابق عظیم بولر نے کہا کہ ضروری کام کے لئے باہرگیا تھا، اس دوران میں کسی سے ملا اور نہ ہی کسی سے ہاتھ ملایا ، اس دوران میں نے 4،4 لڑکوں کو موٹر سائیکلوں پر بیٹھے ہوئے دیکھا، شہری پہاڑوں پر جا کر پکنک منا رہے ہیں، ایک دوسرے کے گھروں میں ملنے کے لئے آ رہے ہیں، مجھے سمجھ نہیں آ رہا کہ ہمارے ہاں کیوں لوگ گھروں میں بیٹھنے کو تیار نہیں ہیں، یہ سرا سر قتل عام ہے، آپ نہ صرف اپنی بلکہ دوسروں کی جانوں کے ساتھ بھی کھیل رہے ۔ یہ سوچنا بندکردیںکہ گرمی پڑے گی تو وائرس بھی ختم ہو جائے گا، ابھی تک تو اس کی ویکسین بھی نہیں نکلی، میری وزیراعظم سے درخواست ہے کہ وہ فوری طو رپر ملک کو لاک ڈاون کر دیں۔
