اسلام آباد : مسلم لیگ ن کی نائب صدر مریم نواز نے وزیراعظم عمران خان پر الزام عائد کیا ہے کہ یہ اہم تقرریاں جادو ٹونے سے کرتے ہیں۔اسلام آباد میں میڈیا سے گفتگو کرتے ہوئے مریم نواز کا کہنا تھا کہ نیب نے میری ضمانت منسوخی کی درخواست دی ہے، نیب میں ضمانت منسوخی کی درخواست دینے والے اپنے ہمدرد کو دیکھنا چاہتی ہوں، درخواست دینے والے شخص کا چہرہ قوم کو دکھانا چاہیے، درخواست دینے والے شخص کو21 نہیں 22 توپوں کی سلامی دینی چاہیے۔مریم نواز کا کہنا تھا میں نہ گرفتاری سے ڈرتی ہوں اور نہ جعلی مقدمے سے ڈرتی ہوں، ضمانت منسوخ کریں اور گرفتار کریں تاکہ لوگوں کو پتا چلے کہ آپ کتنا ڈرتے ہیں۔وزیراعظم کو تنقید کا نشانہ بناتے ہوئے مریم نواز کا کہنا تھا کہ عمران خان آئینی وزیراعظم نہیں ہیں، یہ اہم تقرریاں جادو ٹونے سے کرتے ہیں، جادو ٹونا اتنا ہی کامیاب ہے تو عوام کی بھلائی کے لیے استعمال کیوں نہیں کرتے؟۔انہوں نے مزید کہا کہ جنتر منتر اتنا کامیاب ہے تو پٹرول ڈیزل، آٹا، سستا کریں، جب آپ جنات کے ذریعہ یہ سب کریں تو یہ ہی ہو گا، جنات کچھ اور کہہ رہے ہیں اور آپ کا حساب کچھ اور، ایسے لوگوں پر ہنسی آتی ہے، اگریہی طریقہ رہا تو ملک کا اللہ ہی حافظ ہے۔
