کراچی ۔12 ڈسمبر (سیاست ڈاٹ کام ) وزیر اعظم عمران خان نے سری لنکائی اور پاکستان کرکٹ کے عہدیداروں سے ملاقات کی اور پاکستان کا دورہ کرنے پر سری لنکن حکام کا شکریہ ادا کیا۔ وزیراعظم عمران خان نے 10سال بعد پاکستان میں ٹسٹ کرکٹ کے لیے میدانوں کو آباد کرنے کی غرض سے آنے والی سری لنکائی ٹیم کے عہدیداروں سے ملاقات کی۔ اس موقع پر پی سی بی کے ڈائریکٹر انٹرنیشنل کرکٹ ذاکر خان بھی موجود تھے۔ وزیر اعظم عمران خان نے سری لنکا ٹیم کو پاکستان آمد پر خوش آمدید کہتے ہوئے کہا کہ سری لنکن ٹیم کی آمد کے ساتھ ملک میں ٹسٹ کرکٹ کا دوبارہ آغاز باعث مسرت ہے۔ ملاقات کے دوران وزیراعظم عمران خان اور بورڈ عہدیدارخوشگوار موڈ میں نظر آئے۔ یاد رہے کہ مارچ 2009 میں دہشت گردوں نے لاہور میں سری لنکن ٹیم کی بس پر حملہ کیا تھا جس کے نتیجے میں8 افراد جاں بحق جبکہ کھلاڑیوں اورعہدیداروں سمیت متعدد افراد زخمی ہوئے تھے۔ اس حملے کے بعد پاکستان پر انٹرنیشنل کرکٹ کے دروازے بند ہو گئے تھے اور محدود اوورز کی کرکٹ کی بتدریج واپسی کے باوجود ملک میں ٹسٹ کرکٹ بحال نہ ہو سکی تاہم سری لنکا نے ایک مرتبہ پھر زندہ دلی کا ثبوت دیتے ہوئے پاکستان میں ٹسٹ کرکٹ کھیلنے پر حامی بھر لی۔
