بہاولپور: مسلم لیگ (ن) کی نائب صدر مریم نواز کا کہنا ہیکہ عمران اگر عزت سے جانے پر راضی نہیں تو عوام کے ساتھ ملکر کچھ اور فیصلہ کریں گے۔بہاولپور میں رانا طارق کے گھر میڈیا سے بات کرتے ہوئے مسلم لیگ (ن) کی نائب صدر مریم نواز کا کہنا تھا کہ گزشتہ روز بہاولپور کے عوام نے میرا دل جیت لیا، عوام میرے ساتھ پیدل چلے شاندار استقبال کیا، اور وہاں کے عوام نے سیاسی مزاج سے ہٹ کر اپنا ہی ریکارڈ توڑا، کیوں کہ ریلیاں یہاں کا کلچر نہیں، میں حیران ہوں کہ اتنی بڑی تعداد میں لوگ کبھی گھروں سے نہیں نکلے، اسی لیے میں نے کل کہا تھا پنجاب جاگ گیا ہے۔مریم نواز کا کہنا تھا کہ لانگ مارچ ضرورہوگا لیکن پی ڈی ایم اس کی تاریخ کا اعلان عوام اور موسم کی سہولت کو مدنظر رکھ کر کرے گی، ہم استغفے بھی دیں گے اورعمران خان نے استعفی نہیں دیا تو 31 جنوری کو دیکھیں گے، عمران اگر عزت سے جانے پر راضی نہیں تو عوام کے ساتھ مل کر کچھ اور فیصلہ کریں گے۔پاکستان میں اپوزیشن جماعتوں نے اتحاد قائم کرلیا ہے جس میں پی پی پی اور پی ایم ایل این جیسی حریف جماعتیں بھی یکجا ہوگئی ہیں ۔
