دبئی۔متحدہ عرب امارات میں کھیلی جانے والی انڈین پریمیئر لیگ (آئی پی ایل) نے کرکٹ شائقین میں غیر معمولی دلچسپی پیداکی ہے۔ بی سی سی آئی نے ایک بحران کے ماحول اور اپنے مقام پر نامکمل ٹورنمنٹ کو مکمل کرنے کے لیے شاندار کام کیا ہے ۔ اس ٹورنمنٹ کی حیرت انگیز بات یہ ہے کہ بہت سے نوجوان جو بین الاقوامی سطح پرابھی تک غیر معروف تھے اب انکے بھی مداحوں کی تعداد میں اضافہ اور انہیں بھی شہرت حاصل ہوئی ہے۔ متحدہ عرب امارات میں رواں آئی پی ایل نے کئی نوجوان کھلاڑیوں کو اسٹار بننے کا موقع فراہم کردیا ہے ، جن میں رتوراج گائیکواڈ ، راہول ترپاٹھی ، دیودت پڈککل ، ہرشل پٹیل ، اویس خان ، یشسوی جیسوال ، وینکٹیش ایئر، ارشدیپ سنگھ ، چیتن سکاریہ اور عمران ملک قابل ذکر ہیں جن کے مظاہروں کو دیکھ کر دل خوش ہوگیا۔ یہ نوجوان باصلاحیت کرکٹرز اپنی بیٹنگ یا بولنگ کی صلاحیتوں کے علاوہ دنیا کے بہترین کھلاڑیوں کے ساتھ شانہ بہ شانہ کرکٹ کھیلنے کا حوصلہ اور زیادہ اعتماد رکھتے ہیں۔ آئی پی ایل ٹی20 ورلڈ کپ کا صرف ایک پیش خیمہ ہے، جو 17 اکتوبر2021 کو کوالیفائنگ میچوں کے ساتھ شروع ہو گا اور ہندوستان 24 اکتوبرکو اپنے حریف پاکستان کے خلاف مہم کا آغاز کرے گا۔ پہلے ہی میچ سے دونوں فریقوں میں سے کسی کے لئے شکست ایک ذہنی پریشانی ہوگی حالانکہ ہندوستان کا ورلڈ کپ میں ریکارڈ شاندار ہے ۔ ہندوستانی اسکواڈ کو پہلے ہی تین اجازت شدہ ریزروکے ساتھ ٹورنمنٹ کے لیے منتخب کیا جاچکا ہے تاہمکھڑکی ابھی بھی کھلی ہے کیونکہ اسکواڈ میں تبدیلی کا آخری دن اتوار 10 اکتوبر 2021 ہے۔ یہ ان کھلاڑیوں کے ساتھ ناانصافی ہو سکتی ہے جن کا نام ٹیم میں رکھا گیا ہے لیکن وہ بہتر مظاہرہ نہیں کررہے ہیں۔ یہ سمجھنا ہوگا کہ آئی پی ایل کے بعد ورلڈ ٹی 20 کے بھرے ہوئے کرکٹ شیڈول کی وجہ سے ، کھلاڑیوں کے فارم کو دوبارہ حاصل کرنے یا زخمی ہونے کے بعد سے فٹ ہونے کا کوئی زیادہ وقت یا امید نہیں ہے۔ ہندوستان کے پاس وینکٹیش ایئرکوٹیم میں شامل ہونے کا سنہری موقع ہے ، جس نے نہ صرف ایک بیٹسمین کے طور پر بلکہ ایک مفید آل راؤنڈر کے طور پر اپنی مہارت دکھائی ہے۔ اسی طرح ریتوراج گائیکواڈ اور دیو دت پڈکل نے اوپنرزکے طور پر اپنی صلاحیتوں کو ثابت کیا ہے ، ہرشل پٹیل ایک ذہن ٹی 20 بولر کے طور پر اور یوزویندرچہل بطورلیگ اسپنر اہم امیدوار ہیں۔ جموں وکشمیر اور سن رائزرز حیدرآباد کے نوجوان فاسٹ بولر عمران ملک کی بولنگ دیکھ کر پاکستان کے مشہور بولر وقار یونس کی یاد تازہ ہوتی ہے کیونکہ ان کی بولنگ کا انداز وقار یونس جیسا ہے ۔ وہ ایک اور ممکنہ ہندستانی ورلڈ کپ کھلاڑی بنانے کے دعویدار ہیں جو 100 میل فی گھنٹہ کی رفتارسے بیٹسمینوں کو پریشان کررہے ہیں ۔ہندوستان ٹیم میں تبدیلی کرنے کا فیصلہ کرنے میں صرف چند دن باقی ہیں ، امید ہے کہ ہندوستانی سلیکٹرز اور تھنک ٹینک جس میں اب مہندر سنگھ دھونی شامل ہیں اس مسئلے پر بات چیت کریں گے اور ہندوستانی ٹی 20 ورلڈ کپ ٹیم میں تبدیلی کے امکانات کا سنجیدگی سے جائزہ لیں گے۔ ورلڈ کپ ہمیشہ ایک بہت اہم ٹرافی ہوتی ہے۔ ہندوستان کو2014 کے بعد سے آئی سی سی ٹرافی میں کامیابی نہیں ملی۔ ہندوستانی ٹیم کو کھیل کے تمام فارمیٹس میں دنیا کی بہترین ٹیم کے طور پر دیکھا جاتا ہے۔ ہر ملک کے خلاف انفرادی سیریز میں ان کی کارکردگی جو انہوں نے حال ہی میں کھیلی ہے شاندار رہی۔ تاہم ان کی الماری کچھ عرصے سے ورلڈ کپ کی ٹرافی سے خالی ہے اور ویراٹ قیادت سے سبکدوش ہونے سے قبل اس ٹرافی کو حاصل کرنے کے خواہاں ہوں گے،کیونکہ کوہلی نے اعلان کیا ہے کہ وہ ورلڈکپ کے بعد ٹی20 کی قیادت چھوڑدیں گے۔
