مکہ مکرمہ۔سعودی عرب میں مسجد الحرام و مسجد نبوی ﷺ امور کی جنرل پریذیڈنسی نے کہا ہے کہ طواف سے لے کر سعی تک عمرے کے سارے کام 75 منٹ میں انجام پا رہے ہیں۔ ویب سائٹ کے مطابق جنرل پریذیڈنسی نے 3275 عمرہ زائرین کے ساتھ کئے گئے دو جائزوں کے نتائج جاری کئے ہیں۔ جائزہ لینے والوں نے کہا ہے کورونا وبا کے ماحول میں طواف کا اوسط دورانیہ 25 منٹ، مطاف سے صفا تک پہنچنے کا دورانیہ 8 منٹ جبکہ صفا اور مروہ کے دوران سعی کا اوسط وقت42 منٹ ریکارڈکیاگیا ہے۔ اس طرح طواف سے لے کر سعی کے اختتام تک عمرے کے سارے کام مجموعی طور پر 75 منٹ میں انجام دیے جارہے ہیں۔جائزے میں کہا گیا کہ عمرہ زائرین وباکو پھیلنے سے روکنے کے لئے مقرر حفاظتی تدابیر سے مطمئن نظر آئے۔ انہوں نے اس بات پر اطمینان کا اظہار کیا کہ وبا کے ہنگامی ماحول میں عمرہ کے لئے جو آسانیاں مہیا کی گئی ہیں وہ تسلی بخش ہیں۔یاد رہے کہ سعودی عرب نے نومبر 2020 کے شروع میں بیرون مملکت سے زائرین کو محدود عمرہ پروگرام متعارف کروایا تھا۔ مملکت نے کورونا وائرس کے اثرات سے نمٹنے کے لیے تاریخ میں پہلی بار عمرہ عارضی طور پر معطل کردیا تھا۔سعودی عرب نے مقامی شہریوں اور مقیم غیرملکیوں سے عمرہ، زیارت اور نماز باجماعت کی بحالی کا آغازکیا تھا پھر بیرون مملکت سے عمرہ زائرین کو مملکت آنے کی اجازت دی گئی۔ تیسرے مرحلے میں یومیہ 20 ہزارعمرہ زائرین اور 60 ہزار افراد کو حرم شریف میں نماز ادا کرنے کا موقع دیا جارہا ہے۔
