کراچی ۔20 فروری (سیاست ڈاٹ کام)آل راؤنڈر انور علی کو عمر اکمل کی جگہ کوئٹہ گلیڈی ایٹرز کے اسکواڈ میں شامل کرلیا گیا ہے۔ ایچ بی ایل پی ایس ایل کی ٹیکنکل کمیٹی نے بطور متبادل کھلاڑی انور علی کے نام کی منظوری دے دی ہے۔ ٹیکنکل کمیٹی میں ڈاکٹر سہیل سلیم، سمیرکھوسہ، مرینہ اقبال اور بازید خان شامل ہیں۔ کمیٹی کی سربراہی وسیم خان کررہے ہیں۔بطور متبادل کرکٹر ایچ بی ایل پی ایس ایل 5 میں انور علی کا انتخاب سلورزمرے میںکیاگیا ہے۔ اس سے قبل انور علی ایچ بی ایل پی ایس ایل کے تمام ایڈیشنز میں کوئٹہ گلیڈی ایٹرز کی نمائندگی کرچکے ہیں۔انور علی اب تک 32 ایچ بی ایل پی ایس ایل میچوں میں191 رنز بنانے کے ساتھ ساتھ 23 وکٹیں بھی حاصل کرچکے ہیں۔ ذرائع کے مطابق گلیڈی ایٹرز نے عمر اکمل کے متبادل کے طور پر 8 نام بھیجے تھے۔ ذرائع کا کہنا ہے کہ بھیجے گئے ناموں میں عمادعالم، عمیر یوسف، اسد شفیق، انورعلی، رمیز راجہ جونیئر، محمود علی، عثمان خان اور عثمان صلاح الدین کے نام شامل تھے۔
